AS Ynys Môn yn galw ar ddatblygwyr safle Penrhos i 'gydnabod ei arwyddocâd' i'r gymuned
09/01/2025
Mae Aelod Seneddol Ynys Môn yn galw ar gwmni sydd yn bwriadu codi bron i 500 o fythynnod gwyliau ar safle Penrhos ar yr ynys i ystyried ei bwysigrwydd i'r gymuned.
Mae Llinos Medi AS wedi galw ar The Seventy Ninth Group i "gydnabod arwyddocâd" safle Parc Arfordirol Penrhos i bobl leol.
Daw ei sylwadau wedi i'r cwmni gyhoeddi ddydd Llun eu bod wedi cwblhau'r gwaith o brynu'r safle a'u bod nhw'n bwrw ymlaen gyda’r datblygiad gwerth £250 miliwn.
Dywedodd The Seventy Ninth Group y bydd "perthynas barhaus y mae modd ymddiried ynddi yn cael ei datblygu gyda'r gymuned leol".
Mae gwrthwynebiad chwyrn wedi bod i'r cynllun yn lleol dros nifer o flynyddoedd.
Roedd rhai trigolion yn pryderu y bydden nhw'n colli mynediad i'r parc sydd o fewn Ardal o Harddwch Naturiol Eithriadol.
Ond fe gollodd ymgyrchwyr o grŵp Achub Penrhos eu brwydr gyfreithiol yn erbyn y datblygiad yn yr Uchel Lys ym mis Tachwedd.
Bydd y safle 200 erw yn cael ei ddatblygu fel cyrchfan hamdden, gan gynnwys 492 "caban o ansawdd premiwm", meddai'r cwmni.
Y gred yw y bydd y safle newydd wedi’i gwblhau ymhen pum mlynedd, ac mae disgwyl i’r cabanau cyntaf fod ar gael i ymwelwyr o haf 2025.
'Cyfrifoldeb i wrando'
Mewn datganiad ar y cyfryngau cymdeithasol ddydd Iau, dywedodd Llinos Medi AS: "Rwy'n deall sensitifrwydd a chymhlethdod safle Penrhos.
"Mae’r newyddion am ei bryniant, gan gwmni newydd, yn gyfle pwysig i’r gymuned leol leisio eu pryderon, a chyfrifoldeb y cwmni yw gwrando a chydweithio."
Fe aeth ymlaen i ddweud mai "nid amser ar gyfer gemau gwleidyddol yw hwn, ond cyfle i roi gwybodaeth glir, gywir i’r gymuned am sefyllfa’r safle.
"Fel rhywun sydd wedi treulio oriau di-ri gyda fy nheulu ym Mhenrhos, rwy’n annog y cwmni i gydnabod arwyddocâd y safle i’n cymuned."
Ychwanegodd ei bod wedi creu taflen ffeithiau "er mwyn eich grymuso gyda’r gwir".
Mewn ymateb, dywedodd llefarydd ar ran The Seventy Ninth Group eu bod eisoes wedi cysylltu â "rhanddeiliaid lleol allweddol" i drafod y datblygiad.
Maen nhw'n cynnwys Llinos Medi AS, Rhun ap Iorwerth AS, Cyngor Sir Ynys Môn a Chyngor Tref Caergybi, meddai'r llefarydd.
Dywedodd: "Mae The Seventy Ninth Group yn edrych ymlaen at ddatblygu deialog barhaus, reolaidd ac ystyrlon gyda’r holl randdeiliaid allweddol wrth i ni symud ymlaen â’r buddsoddiad sylweddol hwn ym Mhenrhos, Ynys Môn.
"Mae'n brosiect mawr hirdymor a bydd The Seventy Ninth Group yn sicrhau bod perthynas barhaus y mae modd ymddiried ynddi yn cael ei datblygu gyda'r gymuned leol."
