Mae Cyngor Môn wedi dweud eu bod yn edrych ymlaen at "sefydlu perthynas waith hirdymor" gyda chwmni sydd yn bwriadu codi bron i 500 o fythynnod gwyliau ar safle Penrhos ar yr ynys.

Roedd gwrthwynebiad chwyrn wedi bod i'r cynllun yn lleol dros nifer o flynyddoedd.

Collodd ymgyrchwyr o grŵp Achub Penrhos eu brwydr gyfreithiol yn erbyn y datblygiad yn yr Uchel Lys ym mis Tachwedd.

Ddydd Llun dywedodd cwmni The Seventy Ninth Group eu bod wedi cwblhau'r gwaith o brynu'r safle a'u bod nhw’n bwriadu bwrw ymlaen gyda’r datblygiad gwerth £250 miliwn.

Bydd y safle 200 erw yn cael ei ddatblygu fel cyrchfan hamdden, gan gynnwys 492 "caban o ansawdd premiwm", medd y cwmni.

Y nod meddai The Seventy Ninth Group oedd croesawu “miloedd o ymwelwyr bob blwyddyn”.

Ond bydd y bwyty a chyfleusterau hamdden, pwll nofio, sba, campfa a chaeau chwaraeon a chyrtiau tenis awyr agored hefyd yn hygyrch i drigolion lleol, meddai'r cwmni.

Ar hyn o bryd y gred yw y bydd y safle wedi’i gwblhau ymhen pum mlynedd, a disgwylir i’r cabanau cyntaf fod ar gael i ymwelwyr o Haf 2025.

‘Edrych ymlaen’

Rhoddwyd caniatâd cynllunio amlinellol yn 2016 i adeiladu'r 500 o fythynnod gwyliau yn y parc a sefydlwyd ar gyfer y gymuned yn 1971 gan hen ffatri Alwminiwm Môn.

Ond dadleuodd grŵp Achub Penrhos fod caniatâd cynllunio wedi dod i ben a bod rhaid ailgyflwyno’r datblygiad cyfan ar gyfer caniatâd cynllunio newydd.

Ond penderfynodd barnwr y llynedd bod digon o waith wedi'i wneud, gan wrthod dadl y grŵp.

Dywedodd arweinydd Cyngor Ynys Môn, y Cynghorydd Gary Pritchard, ei fod yn ddatblygiad posib sylweddol o ran yr economi leol.

“Croesewir yr ymrwymiad i symud ymlaen mewn modd sensitif a chynhwysol, yn ogystal â’r ymrwymiad i ymgysylltu â’r gymuned leol,” meddai.

“Edrychwn ymlaen at weithio gyda’r Seventy Ninth Group i ddatblygu themâu allweddol gan gynnwys cyflogaeth leol, cyfleoedd cadwyn gyflenwi, cynaliadwyedd a diogelu’r Gymraeg.”

Dywedodd Jake Webster, Rheolwr Gyfarwyddwr The Seventy Ninth Group ei fod yn “edrych ymlaen at ddatblygu’r safle yn gyrchfan wyliau o safon fyd-eang ar y cyd â’r gymuned leol, wrth sicrhau ein bod yn gwarchod yr amgylchedd ar gyfer cenedlaethau’r dyfodol.

“Ein nod yw rhoi cyfle i deuluoedd o’r Deyrnas Unedig ac ymwelwyr o bob rhan o’r byd brofi’r hyn sydd gan yr ardal wych hon i’w gynnig.”

Llun: JD Media Film