Wrth gau pen y mwdwl ar y blog byw yma, dyma gloi gyda rywfaint o ymateb y Cymry sy'n Washington D.C. i fuddugoliaeth Donald Trump.

Inline Tweet: https://twitter.com/NewyddionS4C/status/1854070842507833623

Y newyddiadurwr Maxine Hughes sy'n ymateb i fuddugoliaeth Donald Trump, wrth i Aled Huw holi dau westai sydd â safbwyntiau gwahanol.

Inline Tweet: https://twitter.com/NewyddionS4C/status/1854075264172544283

Image

Wrth siarad o flaen torf o gefnogwyr yn Florida, dywedodd Donald Trump fod ei ymgyrch wedi "creu hanes" a'i fod yn "mynd i helpu'r wlad i wella".

"Mae'n amlwg rŵan ein bod ni wedi cyflawni'r peth gwleidyddol mwyaf anhygoel," meddai. "Edrychwch beth ddigwyddodd - mae'n wallgo’.

"Hoffwn i ddiolch i bobl yr Unol Daleithiau am y fraint o gael fy ethol yn Arlywydd rhif 47 - a 45."

Fox News yw'r cyntaf i ddatgan yn swyddogol - Donald Trump fydd arlywydd nesaf yr Unol Daleithiau.

Daw wedi iddyn nhw ddatgan ei fod wedi ennill taleithiau Pennsylvania, North Carolina a Georgia.

Mae gwasanaeth newyddion gwleidyddol The Hill wedi datgan yr un fath.

Mae'r New York Times yn dweud fod ganddo siawns dros 95% o ennill.

Mae CNN a CBS wedi datgan fod Trump wedi ennill Pennsylvania ond heb ddweud eto ei fod wedi ennill yr arlywyddiaeth.

Image

Mae gwasanaeth newyddion Fox News wedi datgan bod Donald Trump wedi ennill talaith Pennsylvania.

Roedd yn cael ei hystyried yn dalaith cwbl allweddol i Kamala Harris os oedd ganddi unrhyw obaith o ennill.

Roedd Donald Trump wedi ennill taleithiau North Carolina a Georgia yn gynharach yn y noson.

Serch hynny does yr un gwasanaeth newyddion eto wedi datgan yn swyddogol mai Donald Trump fydd yr arlywydd nesaf.

Inline Tweet: https://twitter.com/KamalaHQ/status/1854036662952620232

Mae cyd-gadeirydd ymgyrch arlywyddol Kamala Harris wedi annerch y gynulleidfa ym Mhrifysgol Howard yn Washington D.C.

Dywedodd Cedric Richmond nad oedd yr ymgyrch eto wedi anobeithio yn llwyr.

“Mae gennym ni bleidleisiau i’w cyfri o hyd,” meddai.  “Mae gennym ni daleithiau sydd heb eu galw eto. 

“Byddwn yn parhau i frwydro dros nos i wneud yn siŵr bod pob pleidlais yn cael eu cyfri', bod pob llais yn cael ei glywed.

“Felly ni fyddwch yn clywed gan yr Is-Arlywydd heno ond byddwch yn clywed ganddi yfory.”

Image

Dyma’r olygfa ar hyn o bryd ym mharti gwylio swyddogol plaid y Democratiaid yn ninas Philadelphia - un o’u cadarnleoedd yn nhalaith bwysig Pennsylvania - lle mae gohebwyr rhaglen Newyddion S4C, Gwyn Loader ac Iwan Griffiths yn cadw llygad ar y canlyniadau.

Roedd y lle yma’n ferw gwyllt o bobl ychydig oriau yn ôl, medden nhw.

Ond dyw pawb ddim yn anobeithio.

Yn ôl y cynrychiolydd taleithiol Keith Harris:

“Roedd pawb yn dweud byddai George Foreman yn curo Muhammad Ali, ond chi’n gwybod beth? Fe enillodd Ali.”

Bydd yn rhaid i Kamala Harris ennill y dalaith allweddol yma os yw hi am lorio Donald Trump.

Mae ABC wedi datgan fod Donald Trump wedi ennill talaith Georgia.

Dyma'r ail o'r taleithiau allweddol iddo eu hennill, wedi iddo ennill North Carolina yn gynharach. Dyma'r dalaith gyntaf iddo ei hennill na lwyddodd i'w hennill yn 2020.

Mae'n golygu y byddai yn rhaid i Kamala Harris ennill Michigan, Pennsylvania, a Wisconsin i fod â gobaith gwirioneddol o ennill yr arlywyddiaeth.

Image

Nid yw’r Is-lywydd Kamala Harris yn bwriadu annerch y dorf ym Mhrifysgol Howard yn Washington D.C. heno, yn ôl ffynhonell o'r Tŷ Gwyn.

Ond mae Donald Trump wedi gadael ei gartref yn Mar-a-Lago yn Florida ac mae ar ei ffordd i Ganolfan Confensiwn Palm Beach, lle mae ei gefnogwyr wedi ymgynnull.

Inline Tweet: https://twitter.com/kleavittnh/status/1854029646947348607

Image

Mae heibio hanner nos ET yn yr Unol Daleithiau ac mae'r gorsafoedd pleidleisio bellach wedi cau ymhobman - gan gynnwys Hawaii ac Alaska.

Fel arall dyw'r darlun ddim wedi newid ryw lawer - mae'r pleidleisiau yn parhau i gael eu cyfri' ond does dim data newydd wedi cyrraedd hyd yma i awgrymu nad Donald Trump yw'r ffefryn i ennill yr etholiad.

Ym Michigan, Pennsylvania a Wisconsin mae rhwng hanner a tri chwarter y bleidlais wedi ei gyfrif gyda Trump ar y blaen ar hyn o bryd yn y tair talaith o rhwng 3-5%

Roedd angen i Kamala Harris ennill bob un ohonyn nhw felly mae angen tro ar fyd o rywle iddi fod yn fuddugol.

Mae hi hefyd 2% ar ei hol hi yn Georgia gyda bron y cyfan o'r pleidleisiau wedi eu cyfri, ac eisoes wedi colli yn North Carolina.

Image

Mae'r Associated Press wedi datgan bod Donald Trump wedi ennill talaith North Carolina.

Dyma'r cyntaf o'r saith talaith allweddol iddyn nhw ei ddatgan yn ffurfiol.

Fe enillodd North Carolina yn 2020 hefyd felly byddai hynny yn ei hun ddim yn ergyd farwol i obeithion y Democratiaid.

Ond ar hyn o bryd mae hefyd disgwyl iddo ennill Georgia ac mae gogwydd tuag ato, meddai y New York Times, yn nhaleithiau Wisconsin, Michigan, Pennsylvania ac Arizona.

Does dim data eto ar gyfer yr un talaith ymylol sy'n weddill, sef Nevada.

Image

Wynebau pryderus yn y parti gwylio y blaid Ddemocrataidd yn Philadelphia, Pennsylvania lle mae gohebwyr Newyddion S4C, Gwyn Loader ac Iwan Griffiths.

Mae'n ymddangos bod Donald Trump yn ennill tir yn nhaleithiau ymylol Georgia a gogledd Carolina.

Image

Mae'r New York Times bellach yn datgan bod Donald Trump yn ffefryn clir i ennill yr etholiad, ar y sail bod talaith Michigan yn gwyro tuag at y Gweriniaethwyr.

Dim ond chwarter pleidleisiau'r dalaith sydd wedi eu cyfri' hyd yma ond mae'r bleidlais sydd i mewn yn awgrymu mai Trump eith a hi.

Mae angen i Kamala Harris amddiffyn y 'wal las' sef Pennsylvania, Wisconsin a Michigan a enillwyd gan Biden i fod â gobaith o ennill.

Ar hyn o bryd mae Kamala Harris ar y dibyn - ond dyw hi ddim wedi mynd drosto eto.

Image

Mae'r gorsafoedd pleidleisio bellach wedi cau yn Nevada, sef yr olaf o'r taleithiau sydd yn y fantol, yn ogystal a Nevada ac Utah, a'r rhan fwyaf o Idaho a rhannau o Oregon.

Mae'n golygu mai dim ond California a thalaith Washington sy'n weddill ar dir mawr yr Unol Daleithiau, a fydd yn cau mewn awr, a bydd Hawaii ac Alaska yn cau mewn dwyawr am 05.00.

Am y tro beth bynnag bydd llygaid pawb ymhellach i'r dwyrain, ar Pennsylvania, Wisconsin a Michigan. 

Ar hyn o bryd mae'r bleidlais yno'n ymddangos yn dynn iawn sy'n awgrymu efallai na fydd y ras arlywyddol yn cael ei gyhoeddi yn fuan.

Mae'n werth cofio, yn 2008 a 2012, roedd Barack Obama wedi ei ddatgan yn arlywydd cyn 05.00, ond yn 2020 fe gymerodd nes dydd Sadwrn.

Image

Mae'n ymddangos ar hyn o bryd yn fwy tebygol y bydd Donald Trump yn ennill Georgia a North Carolina.

Os felly mae angen i Kamala Harris ennill tair talaith arall - Wisconsin, Michigan a Pennsylvania.

Mae ennill bob un am fod yn dalcen caled, yn enwedig felly gan ei fod yn debygol y bydd y symudiad sydd wedi bod tuag at Trump mewn taleithiau eraill yn digwydd yn y taleithiau rheini hefyd.

Ond nid yw'n amhosib! Felly ar hyn o bryd mae mantais gan Trump ond nid yw'n sicr o ennill.

Image

Mae'r gorsafoedd pleidleisio wedi cau yn gyfan gwbwl am 02.00 mewn dwy arall o'r taleithiau allweddol, sef Michigan a Wisconsin.

Dyma'r taleithiau sydd wedi eu galw hyd yma.

Trump: Texas, Wyoming, Louisiana, South Dakota, North Dakota, Nebraska, Florida, Arkansas, South Carolina, Tennessee, Oklahoma, Alabama, Mississippi, West Virginia, Indiana a Kentucky

Kamala Harris: New York, Delaware. Illinois, New Jersey, Rhode Island, Massachusetts, Connecticut, Maryland a Vermont

Dyw'r un o'r saith talaith allweddol wedi eu galw eto.

Mae'n ymddangos fel bod yr arolygon barn yn weddol agos ati - a'i bod hi am fod yn ras agos iawn rhwng Kamala Harris a Donald Trump.

Inline Tweet: https://twitter.com/admcrlsn/status/1853961585661972617

Mae rhai arwyddion pryderus i gefnogwyr Kamala Harris, gyda Trump yn parhau ar y blaen yn Georgia a North Carolina, dwy dalaith yr oedd hi wedi gobeithio eu hennill.

Fe allai hynny newid wrth gwrs - fel y nodwyd yn flaenorol mae siroedd gwledig yn tueddu i gyfri yn gynt na rhai dinesig.

Ond mae yna le i gefnogwyr Harris i bryderu bod Trump yn gwneud yn well mewn ardaloedd gwledig nag oedd yn 2020, tra nad yw Harris eto wedi dangos arwyddion o wneud yn well nag oedd Biden yn 2020 yn y dinasoedd.

Mae'n werth nodi serch hynny nad oed o reidrwydd angen Georgia a North Carolina ar Harris i ennill yr arlywyddiaeth - gall wneud hynny drwy ennill Pennsylvania, Michigan a Wisconsin.

Gobaith ei chefnogwyr yw na fydd yr un patrwm yn amlygu ei hun yn y taleithiau rheini.

Image

Prif ohebydd Newyddion S4C Gwyn Loader sy'n gwylio'r canlyniadau wrth iddyn nhw ddod i mewn o dalaith allweddol Pennsylvania...

Yn Philadelphia, rydw i ac Iwan Griffiths mewn parti gwylio canlyniadau gyda Democratiaid ifanc.

Maen nhw’n paratoi am noson hir yma a’r cyflenwadau bwyd swmpus newydd gyrraedd.

“Y’ch chi’n hyderus?” dwi’n gofyn wrth i un dyn gyrraedd.

“Dwi’n gwybod bod ni ‘di ennill eisoes” yw’r ateb hyderus.

Mae’n gynnar eto ond mae hwyliau da ar y rhai sydd yn ymgynnull yn y cadarnle Democrataidd yma.

Image

Mae gorsafoedd pleidleisio wedi cau am 01.00 rŵan mewn rhestr hir o daleithiau allweddol.

O’r saith talaith gystadleuol a fydd yn penderfynu pwy fydd yn fuddugol, dim ond Minnesota, Arizona a Nevada sy’n weddill.

Bellach yn cyfri’ eu pleidleisiau mae:

• Alabama (mwyafrif y dalaith)
• Connecticut
• Delaware
• Florida (y siroedd gorllewinol oedd yn weddill)
• Illinois
• Kansas (mwyafrif y dalaith)
• Maine
• Maryland
• Massachusetts
• Michigan (mwyafrif y dalaith)
• Mississippi
• Missouri
• New Hampshire
• New Jersey
• North Dakota (rhan ddwyreiniol y dalaith)
• Oklahoma
• Pennsylvania
• Rhode Island
• South Dakota (mwyafrif y dalaith)
• Tennessee
• Texas (mwyafrif y dalaith tu hwnt i ddarn gorllewinol)
• Washington D.C.

Dyma’r canlyniadau yn dod...

Image

Mae'n ddyddiau cynnar, gyda'r gorsafoedd pleidleisio bellach wedi cau yn llwyr mewn dwy o'r taleithiau allweddol, sef Georgia a North Carolina.

Mae Donald Trump ar y blaen yn Georgia a Kamala Harris ar y blaen yn North Carolina ond eto cyfran fach iawn o'r pleidleisiau sydd wedi eu cyfri, ac fel oedden ni wedi nodi yn gynharach mae'r bleidlais sy'n cael ei gyfri' gyntaf yn gallu ffafrio un blaid dros y llall.

Un peth sy'n ymddangos yn weddol sicr ar hyn o bryd yw bod Florida a oedd yn dalaith gystadleuol wedi symud ymhellach i'r dde - gyda thri chwarter y pleidleisiau wedi eu cyfri' mae Donald Trump 10% ar y blaen, ar ôl ennill o 4% yn 2020. Mae wedi bod yn newid byd gwleidyddol yno ers 2012 - y tro diwethaf i'r Democratiaid ennill a hynny o lai nag 1%.

Am 01.00 amser Cymru bydd canlyniadau Pennsylvania a Michigan yn dechrau cyrraedd - taleithiau mae'n rhaid i Kamala Harris eu hennill.

Image

Mae gwasanaethau newyddion yr Unol Daleithiau yn gystadleuol iawn wrth fod y cyntaf i 'alw' taleithiau i'r ymgeiswyr arlywyddol gwahanol.

Mae CNN eisoes wedi dweud mai Trump fydd yn ennill Kentucky, ac mai Harris fydd yn ennill Vermont. Mae ABC wedi 'galw' Indiana i Trump. Ni fydd y canlyniadau rheini yn syndod i unrhyw un a bydd y penderfyniad wedi ei wneud ar sail cyfran isel iawn o'r bleidlais.

Yr unig daleithiau o'r 50 lle mae disgwyl canlyniad agos yw'r saith canlynol: Pennsylvania, Michigan, Wisconsin, Georgia, North Carolina, Arizona a Nevada.

Mae'r bleidlais yn Georgia wedi dechrau dod i mewn yn araf bach. Mae oriau pleidleisio 12 o'r gorsafoedd yn Georgia wedi cael eu hymestyn oherwydd bygythiadau bom, yn ôl yr Ysgrifennydd Gwladol Brad Raffensperger.

Pryd y daw'r canlyniad terfynol?

Mae'r gwasanaethau newyddion hefyd yn gystadleuol wrth gyhoeddi canlyniad y ras gyfan, wrth gwrs. 

Dyma pryd wnaeth Associated Press hynny yn yr etholiadau diwethaf:

• 2020: Sadwrn, 16.26
• 2016: Mercher, 07.29
• 2012: Mercher, 04.38
• 2008: Mercher, 4.00
• 2004: Mercher, 16.19

Mae'n debygol felly y cawn ni'r canlyniad heddiw - ond ddim yn sicr!

Image

Mae bellach modd dilyn y canlyniadau wrth iddyn nhw gyrraedd ar sawl gwefan, e.e. Bloomberg. Ond rhaid pwyllo cyn dod i unrhyw gasgliadau ar sail canran isel o'r bleidlais.

Mae yna rywfaint o drafod wedi bod cyn yr etholiad am y 'rhithlun coch' (red mirage).

Mae pleidleisiau mewn ardaloedd gwledig, llai poblog sy'n ffafrio y Gweriniaethwyr yn tueddu i gael eu cyfri yn gynt na phleidleisiau mewn ardaloedd dwys, dinesig sy'n ffafrio y Democratiaid.

Yn hwyrach ymlaen mae yna symudiad glas (blue shift) tuag at y Democratiaid (ond nid yw hynny bob tro yn ddigon i ennill yr etholiadau taleithiol, wrth gwrs).

O ganlyniad, wrth i'r pleidleisiau cyntaf anghyflawn ddechrau cyrraedd ar sail y siroedd (counties) sy'n rhan o daleithiau cystadleuol, mae'n bwysig peidio gor-ymateb nes cael y darlun llawn.

Inline Tweet: https://twitter.com/lxeagle17/status/1853942260603511226

Image

Mae'r gorsafoedd pleidleisio cyntaf wedi cau mewn rhannau o Kentucky ac Indiana.

Hanner nos amser Cymru (19.00 ET) yw'r awr fawr oherwydd bryd hynny fe fydd gweddill blychau pleidleisio Kentucky ac Indiana a hefyd rhannau o Alabama yn cau, a hefyd:

• Georgia
• Florida (y rhan fwyaf o'r dalaith)
• Rhai o daleithiau Indiana
• Kentucky
• New Hampshire (y rhan fwyaf o'r dalaith)
• South Carolina
• Vermont
• Virginia

Mae'r rhain wrth gwrs yn cynnwys un talaith - Georgia - sydd wedi bod yn gystadleuol iawn yn ystod yr ymgyrch arlywyddol. Nid yw Florida mor gystadleuol bellach ag oedd yn nyddiau Barack Obama, gyda disgwyl i Donald Trump ennill y dalaith yn weddol gyfforddus.

Os yw Donald Trump am gael noson anodd fe allai'r arwyddion cyntaf o hynny ddod i'r amlwg wedi hanner nos.

Inline Tweet: https://twitter.com/NewyddionS4C/status/1853902247052054562

Mae Cymro a Chymraes ifanc, Elena Gower ac Iwan Pyrs Jones, hefyd wedi bod yn pleidleisio heddiw yr etholiad arlywyddol UDA. 

Aled Huw fu'n siarad â nhw am eu dewis ar raglen Newyddion S4C.

Image

Mae arolwg barn CNN wrth i bobl adael y gorsafoedd pleidleisio yn awgrymu bod gan tua thri chwarter yr etholwyr farn negyddol am y ffordd y mae pethau’n mynd yn yr Unol Daleithiau heddiw.

Dim ond tua chwarter sy’n galw eu hunain yn frwdfrydig neu’n fodlon â chyflwr y genedl, gyda mwy na phedwar o bob 10 yn anfodlon a thua tri o bob 10 yn dweud eu bod yn 'ddig'.

Dan amgylchiadau arferol fe allai ffigyrau o'r fath fod yn newyddion drwg i'r blaid sydd mewn grym - ond a ydi'r rhain yn amgylchiadau arferol?

Inline Tweet: https://twitter.com/NewyddionS4C/status/1853925282710733279

Hyd yn oed cyn i'r gorsafoedd pleidleisio gau mae Donald Trump eisoes wedi trydar heno ar y cyfrwng cymdeithasol y mae'n berchen arno, Truth Social, yn codi amheuon am yr etholiad.

Inline Tweet: https://twitter.com/TrumpDailyPosts/status/1853917418416156873

Image

Am hanner nos amser Cymru fe fydd y gorsafoedd pleidleisio wedi cau yn Georgia, Indiana, Kentucky, South Carolina, Virginia a Vermont.

Os ydych chi'n bwriadu aros i fyny - neu efallai mynd i'r gwely a deffro eto yn oriau mân y bore - efallai eich bod chi eisiau gwybod pryd y bydd canlyniad yr etholiad yn amlwg.

Yn anffodus mae'n anodd ateb y cwestiwn hwnnw i sicrwydd. Efallai y byddwn ni'n gwybod yn reit bendant erbyn tua 03.00 amser Cymru, ond os yw'n bleidlais yn agos iawn yn y taleithiau allweddol efallai y bydd angen disgwyl am amser hirach.

Gallai fod yn ddyddiau, neu hyd yn oed yn wythnosau os aiff pethau yn flêr...

Dyma ganllaw: Etholiad UDA: Pryd fyddwn ni’n gwybod pwy yw’r Arlywydd nesaf?

Inline Tweet: https://twitter.com/NewyddionS4C/status/1853914896800354666

'Mae'n edrych yn wahanol iawn i ni fan hyn a sut mae'n edrych ar y teledu!' meddai Maxine Hughes gan roi cipolwg i ni ar yr hyn nad yw'r camera yn ei weld fel arfer.

Inline Tweet: https://twitter.com/NewyddionS4C/status/1853888345455157740

Mae yna bryderon am yr ymateb pan fydd canlyniadau'r etholiad yn cael eu cyhoeddi, yn enwedig felly os yw Kamala Harris yn trechu Donald Trump.

'Fel newyddiadurwyr da ni'n trafod a oes gyda ni flak jackets gas masks, achos 'da ni yn disgwyl trais ar y strydoedd,' meddai'r newyddiadurwr Maxine Hughes, sy'n byw yn Washington D.C.

Inline Tweet: https://twitter.com/NewyddionS4C/status/1853845643124412786

'Dwi’n poeni ychydig dros ddyfodol gwareiddiad yma.'

Mae gohebwyr Newyddion S4C, Gwyn Loader ac Iwan Griffiths, wedi bod yn nhalaith Ohio yn casglu barn y Cymru sydd bellach wedi ymgartrefu yno, a'r Americanwyr hefyd.

Mae modd darllen eu hargraffiadau yn llawn fan hyn.

Image

Mae diwrnod yr etholiad wedi cyrraedd yn yr Unol Daleithiau.

Bydd miliynau o Americanwyr yn pleidleisio ar Dachwedd y 5ed ar ôl ymgyrch sydd wedi parhau misoedd lawer.

Mae’r polau piniwn diweddaraf yn awgrymu nad oes yna adain gwybedyn rhwng y ddau ymgeisydd yn y ras, y Gweriniaethwr a'r cyn-Arlywydd Donald Trump ac ymgeisydd y Democratiaid, yr Is-Arlywydd Kamala Harris.

Arhoswch gyda blog byw Newyddion S4C wrth i ni ddod â'r diweddaraf i chi o bob rhan o UDA.