Mae llong bleser a adawodd Belfast nos Lun wedi misoedd o oedi, ar ei ffordd yn ôl i'r porthladd am nad yw'r gwaith papur ar ei chyfer wedi ei gwblhau.  

Roedd y Villa Vie Residences' Odyssey i fod i adael y ddinas fis Mai, ond bum mis yn ddiweddarach a dyw'r  llong ddim wedi dechrau ar ei mordaith dair blynedd. 

Angorodd y llong oddi ar arfordir Gogledd Iwerddon dros nos, ac roedd disgwyl iddi barhau â'i thaith eto ddydd Mawrth. 

Ond mae'r teithwr wedi cael gwybod y byddan nhw'n dychwelyd i Belfast er mwyn cwblhau'r gwaith papur terfynol. 

Y bwriad gwreiddiol oedd gadael ar 30 Mai ond doedd dim modd gweud hynny yn sgil problemau gyda'r llyw a'r gerbocs.

Er y misoedd o aros, mae'r teithwyr yn dweud eu bod wedi syrthio mewn cariad â Belfast. 

'Profiad hynod'

Yn ôl Holly Hennessy sydd yn dod o Florida, mae'r bobl wedi bod yn groesawgar iawn.

"Er nad yw'r tywydd wedi bod yn gynnes mae'r bobl wedi bod yn dwymgalon iawn," meddai.

"Mae wedi bod yn brofiad hynod."

Mae Gian Perroni ac Angela Harsanyi, wnaeth gwrdd ar y llong ac sydd nawr am briodi hefyd yn canmol y trigolion lleol.

"Rydyn ni i gyd wedi cael y cyfle i deithio a mynd adref yn ôl y galw. Felly rydyn ni wedi dysgu i fod yn amyneddgar a dyfalbarhau ac wedi dysgu pa mor hyfryd mae pobl Belfast wedi bod."

Ar ôl cwblhau'r gwaith papur, y gobaith yw y bydd y llong yn teithio ar draws y byd am y tair blynedd nesaf. 

Yn ôl gwefan Harbwr Belfast, mae disgwyl i'r llong adael Belfast eto am 23:00 nos Fawrth.

Llun: Villa Vie Odyssey / X