Mae 'dwsinau o bobl' wedi eu lladd mewn tân mewn canolfan sgïo yn Y Swistir yn ôl yr heddlu yn y wlad. 

Fe ddechreuodd y tân am tua 01:30 mewn bar o'r enw Le Constellation yng nghanolfan sgïo Crans-Montana.

Ychwanegodd yr heddlu fod mwy na 100 o bobl wedi eu hanafu.

Nid yw achos y tân yn glir eto ond mae'r heddlu wedi awgrymu fod yna ffrwydrad wedi bod, gydag adroddiadau lleol yn dweud fod tân gwyllt wedi cael ei ddefnyddio. 

Mae'r heddlu wedi cadarnhau nad yw'r digwyddiad yn cael ei drin fel un terfysgol. 

Yn ôl adroddiadau, roedd mwy na 100 o bobl yn y bar pan ddigwyddodd y ffrwydrad. 

Mae'r ardal wedi ei chau lawr yn llwyr ac mae yna barth dim hedfan mewn grym yn yr ardal. 

Mae llinell gymorth wedi cael ei sefydlu ar gyfer teuluoedd y rhai sydd wedi'u heffeithio yn ôl yr heddlu.

Mae Crans-Montana yn dref sgïo moethus sydd wedi'i lleoli yng nghanol Alpau'r Swistir, tua dwy awr o brifddinas y wlad, Bern.