Mae gan efeilliaid o Wynedd "dyfodol disglair" ym myd bocsio, yn ôl eu hyfforddwr.

Mae Morgan a Meilir o Glynnog Fawr eisoes wedi cael eu cymharu i efeilliaid eraill o Gymru sydd wedi profi llwyddiant yn y gamp, Ioan a Garan Croft.

Enillodd y brodyr Croft o Grymych, Sir Benfro fedalau aur ac efydd yng Ngemau'r Gymanwlad yn 2022.

Roedd Morgan a Meilir wedi dechrau eu taith i'r byd bocsio trwy fynd i wersi karate pan oeddynt yn 5 oed.

Ond wrth i'r ddau dyfu, fe benderfynodd y ddau eu bod nhw am ddechrau bocsio.

“Oedd Meilir a fi yn ffeindio karate ddiflas," meddai Morgan.

Dywedodd Meilir: “Oeddan ni wedi bod yn watshad bocsio efo dad ar y teledu tipyn a wnaethon ni drio karate ond doedden ni ddim yn mwynhau o felly wnaethon ni drio bocsio."

Image

Bellach mae'r ddau yn eu harddegau ac yn aelodau o glwb bocsio Dyffryn ym Mae Colwyn.

Ym mis Mai eleni roedd y ddau wedi ennill ym Mhencampwriaethau Cenedlaethol Bocsio Ysgolion a Phobl Ifanc Cymru yn eu categori pwysau.

Mae Wes Jones, hyfforddwr yr efeilliaid yn dweud bod eu hymrwymiad i'r gamp yn rhoi addewid am ddyfodol disglair.

"Dros y blynyddoedd rydym ni wedi cael 61 pencampwr cenedlaethol, tri phencampwr Prydeinig a bocsiwr sydd wedi cystadlu yng Ngemau’r Gymanwlad.

"Mae Morgan a Meilir wedi bod efo ni dros y tymor diwethaf, maen nhw'n ymrwymo’n fawr i ymarfer ac mae'r ddau yn gwella.

"Mae'r dyfodol yn edrych yn ddisglair iawn iddyn nhw."

Llun: Bocsio Cymru