Cyngor Caerdydd 'ddim am barhau â chais i gynnal Eurovision'
Mae Cyngor Caerdydd wedi cadarnhau na fyddan nhw'n parhau â chais i gynnal Eurovision yn y ddinas.
Dywed Cyngor Dinas Caerdydd y byddai cynnal digwyddiad o'r fath yn golygu "canslo nifer sylweddol o ddigwyddiadau sydd wedi'u trefnu".
Fe fydd y DU yn cynnal y gystadleuaeth y flwyddyn nesaf ar ôl iddyn nhw orffen yn ail i Wcráin ym mis Mai.
Ni fydd Eurovision yn cael ei chynnal yn Wcráin yn sgil ymosodiad Rwsia ar y wlad a'r rhyfel sy'n parhau yno.
Roedd nifer o ddinasoedd wedi cynnig eu henwau, gan gynnwys Caerdydd.
Mewn datganiad ar y cyd rhwng Cyngor Dinas Caerdydd, Llywodraeth Cymru a Stadiwm Principality ddydd Mercher, dywedodd yr asiantaethau y byddai Caerdydd wedi "gweddu'n naturiol ar gyfer cynhyrchiad mor sylweddol".
Yn y datganiad, fe ddywedodd y Cyngor a'r Llywodraeth y byddai gan Gaerdydd "ddadl gref" dros gynnal y digwyddiad.
Er i'r trafodaethau barhau am unrhyw opsiynau posibl a allai fod wedi gallu cynnal y digwyddiad, nid oes "ateb ymarferol".
Mae Cyngor Dinas Caerdydd, Llywodraeth Cymru a Stadiwm Principality wedi cytuno ar y cyd â'r BBC na fydd hi'n bosib i Gaerdydd barhau â'r cais.
Mae disgwyl i leoliad Eurovision y flwyddyn nesaf gael ei gyhoeddi yn ystod y misoedd nesaf.