Mae Heddlu Gogledd Cymru wedi dweud fod ganddyn nhw “bryder cynyddol” am fachgen 16 oed bregus sydd wedi mynd ar goll yn ardal Llandudno, Sir Conwy.

Mae’r llu a gwylwyr y glannau wedi bod yn chwilio am Athrun "ar y tir, y dŵr ac o'r awyr" wedi iddo gael ei weld ddiwethaf am 14:00 ddydd Sadwrn ar draeth gorllewin Llandudno mewn siorts nofio a heb dop na'i esgidiau.

Dywedodd yr heddlu eu bod nhw am i'r cyhoedd gadw llygad amdano ond i beidio â chwilio mewn mannau peryglus a fydd eisoes wedi'u gwirio gan weithwyr proffesiynol.

Wrth ddiolch i'r cyhoedd am eu cymorth dywedodd y llu: “Mae gennym bryder cynyddol am Athrun gan ei fod yn berson bregus.

“Mae'n 6 troedfedd, gwallt brown, ac mae ganddo lygaid glas. Roedd yn gwisgo siorts nofio patrymog glas a gwyn yn unig, a dim esgidiau. Nid yw'n gwisgo clustffonau fel y gwelir yn y llun.”

Mae’r llu wedi annog pobl sy’n byw yn y cyffiniau i wirio eu gerddi, siediau a thai allan.

Ychwanegodd yr Arolygydd Rachel Hare: ''Hoffwn ddiolch i'r cyhoedd am rhoi gwybodaeth i ni am ei weld hyd yn hyn, mae'r rhain wedi'u gwirio a'u negyddu.'

“Ffoniwch ni ar 101 neu gwe-sgwrs os gwelwch yn dda os gwelwch yn dda, cyfeirnod C067064.”

Mewn diweddariad pellach ddydd Sul fe ddywedodd y Ditectif Prif Arolygydd Simon Kneale eu bod nhw am i unrhyw un sydd â lluniau camera dashfwrdd yng nghyffiniau Glan y Gorllewin rhwng 12.00 ac 18.00 eu gwirio am Athrun. 

"Hefyd, os gwnaethoch chi dynnu unrhyw luniau yn ardal Glan y Gorllewin yn Llandudno ddoe, a allwch chi roi gwybod i ni," meddai.

Llun: Heddlu Gogledd Cymru