Mae Heddlu'r De'n cynnal ymchwiliad i lofruddiaeth wedi i ddyn 38 oed farw yn Y Barri, Bro Morgannwg nos Lun. 

Mae dau lanc 16 ac 17 oed o Lanilltud Fawr wedi eu harestio ar amheuaeth o'i lofruddio ac maen nhw yn cael eu cadw yn y ddalfa. 

Mae nifer o ffyrdd yn y Barri wedi eu cau a phabell wen fforensig wedi ei chodi yn yr ardal.

Cafodd yr heddlu eu galw i adroddiadau fod person wedi ei drywanu toc cyn hanner nos, nos Lun.    

Image

Dywedodd y Ditectif Uwcharolygydd Mark O'Shea o Heddlu De Cymru: "Mae hon yn gymuned glos, a bydd yr hyn sydd wedi digwydd wedi syfrdanu pobl yr ardal.    

"Rydym yn ymwybodol fod y digwyddiad yn cael effaith sylweddol ar y gymuned yn lleol, gyda ffyrdd ar gau ac ysgol ar gau gydol y dydd. 

"Rydym yn diolch i'r cyhoedd am eu cefnogaeth a'u dealltwriaeth."

Dywedodd Cyngor Bro Morgannwg bod Ysgol Gynradd Parc Jenner ar Stryd Hannah y Barri ar gau ddydd Mawrth. 

Mae'r heddlu'n rhybuddio y bydd rhai ffyrdd ar gau am beth amser wrth i'w hymchwiliad barhau.    

Mae teulu'r dyn sydd wedi marw yn cael eu cefnogi gan swyddogion arbenigol yr heddlu.