Mae swyddogion tân yng Nghymru yn dweud bod newid hinsawdd yn gwneud eu swyddi yn "anoddach" gan achosi cynnydd yn y nifer o dannau gwyllt. 

Daw'r rhybudd wedi i Gymru gofnodi ei diwrnod poethaf erioed ddydd Llun wrth i'r tymheredd gyrraedd 37.1 gradd Celsius yn Sir y Fflint. 

Yn sgil cynhesu byd eang, mae disgwyl i Gymru brofi hafau hirach a phoethach, gan weld tymereddau eithafol yn fwy aml. 

Mae'r tymereddau uchel yma ynghyd â thywydd sychach yn achosi "cynnydd dramatig" yn y risg o dannau gwyllt, yn ôl y Gwasanaeth Tân ac Achub. 

Mae Iwan Cray yn ddirprwy brif swyddog tân Canolbarth a Gorllewin Cymru ac yn gadeirydd Bwrdd Tannau Gwyllt dros Gymru. Mae'n dweud bod y newid yn yr hinsawdd yn cael dylanwad sylweddol ar ei swydd. 

“Mae’n sicr yn neud ein gwaith ni’n anoddach ac mae’n bwysig. Mae gennym ni gyd rhan i chwarae yn y newid yn ein hinsawdd," meddai. 

"Beth y’ ni’n gweld o gwmpas Ewrop yw bod y tannau yn mynd yn fwy ac yn mynd yn fwy allan o reolaeth.”

'Rhaid delio gyda hwn nawr'

Yn ystod wythnos y Sioe Frenhinol, mae'r Gwasanaethau Tân ac Achub yn cynnal amryw o ddigwyddiadau i godi ymwybyddiaeth o beryg tannau gwyllt.

Yn ôl y Gwasanaeth Tân mae 96% o dannau gwyllt yn cael eu cynnau yn fwriadol.

Dywedodd Mr Cray ei fod yn ymwybodol bod llosgi tir yn rhan o hanes amaethyddiaeth yng Nghymru, ond bod y gwasanaeth tân yn ceisio cydweithio gyda ffermwyr i leihau'r risg. 

"Ni eisiau adeiladu ar y berthynas sydd gyda ni gydag amaethwyr a thirfeddianwyr a'r rhan maen nhw'n chwarae yn llosgi'r tir dros Gymru," dywedodd. 

"Ni'n derbyn bod llosgi'r tir yn rhan o hanes ac yn rhan o reoli tir ac wedi bod am ganrifoedd." 

“Ond beth sydd yn bwysig i ni fel gwasanaethau yw bod y llosgi yn digwydd o dan reolaeth.”

“Dyna pam ni am gael y drafodaeth yma trwy’r wythnos er mwyn ffeindio ffyrdd i reoli'r tannau 'ma cyn bod nhw’n cyrraedd y pwynt lle maen nhw allan o reolaeth.”

Fel rhan o'i gwaith i leihau tannau gwyllt, mae'r gwasanaeth tân yn cydweithio gyda'r prosiect Llethrau Llon, sydd yn ceisio amddiffyn natur yn sgil effeithiau newid hinsawdd yng Nghymru. 

"Da ni yn y Sioe i weithio a siarad gyda ffermwyr ynglŷn â sut maen nhw'n delio a'u tir a sut maen nhw'n llosgi eu tir," meddai Hannah Hughes, sydd yn gweithio gyda'r prosiect. 

"Mae newid hinsawdd yn golygu bod tannau gwyllt yn mynd i fod yn fwy aml a dy' ni ddim yn cael be ni angen i ddelio gyda'r tannau yma yng Nghymru." 

"Mae rhaid i ni ddelio gyda hyn nawr cyn iddo fynd yn waeth."