Newyddion S4C

Geraint Thomas

Geraint Thomas yn dal yn drydydd yn y Tour de France

NS4C 17/07/2022

Mae’r Geraint Thomas yn dal ymhlith y ceffylau blaen ar ôl cymal 15 o’r Tour de France ddydd Sul.

Mae’n dal yn y trydydd safle, 21 eiliad o hyd y tu ôl i Tadej Pogacar o Slofenia sydd yn yr ail safle yn gyffredinol.

Jonas Vingegaard o Ddenmarc sy’n cadw’i afael ar y crys melyn.

Jasper Philipsen o Wlad Belg o Awstralia oedd yn fuddugol ar y cymal 202.5km o hyd o Rodez i Carcassonne ddydd Sul.

Cafodd y Cymro Owain Doull anffawd gan syrthio i’r tarmac ar ôl methu ag osgoi potel ddŵr ar y llawr ond fe lwyddodd i gario ymlaen.

Bu'n rhaid iddo gael ychydig o driniaeth o'r car meddygol wrth iddo seiclo i lawr rhiw ar gyflymdra o 43 milltir yr awr.

Roedd hwn yn gymal hir a phoeth gyda’r timau yn gorfod paratoi y seiclwyr am y gwres uchel ar y cymal.

Roedd disgwyl i’r seiclwyr yfed tua 12 litr o ddŵr yr un yn ystod y daith gyda rhai yn gosod talpiau o iâ i lawr eu crysau i leddfu’r gwres.

Roedd hwn yn gymal pontio rhwng mynyddoedd yr Aplau a’r Pyrenees cyn diwrnod o orffwys ddydd Llun.

Bydd y ras yn parhau ddydd Mawrth ar gymal 178.5km o Carcassonne i Foix.

Llun: Twitter/Ineos Grenadiers

This website uses cookies to ensure you get the best experience on our website.