Suella Braverman yw'r diweddaraf i adael y ras am arweinyddiaeth y Ceidwadwyr yn dilyn ail rownd o bleidleisio gan aelodau seneddol Ceidwadol ddydd Iau.

Fe fydd y pum ymgeisydd sydd ar ôl yn wynebu rownd arall o bleidleisio ddydd Llun.

Y pum aelod sy'n weddill yw Kemi Badenoch, Penny Mordaunt, Rishi Sunak, Liz Truss a Tom Tugendhat.

Cafodd canlyniad yr ail bleidlais ei gyhoeddi gan gadeirydd Pwyllgor 1922, Syr Graham Brady, am 15:00 ddydd Iau.

Canlyniad y bleidlais oedd:

• Kemi Badenoch, 49
• Penny Mordaunt, 83
• Rishi Sunak, 101
• Liz Truss, 64
• Tom Tugendhat, 32
• Suella Braverman, 27

Fe lansiodd yr Ysgrifennydd Tramor Liz Truss ei hymgyrch am yr arweinyddiaeth yn gynharach yn y dydd, gan ddweud y byddai'n barod i fod yn brif weinidog o'r diwrnod cyntaf.

Y cyn-Ganghellor Rishi Sunak oedd yn fuddugol yn y rownd gyntaf o bleidleisio, gyda Penny Mordaunt yn sicrhau'r ail nifer uchaf o bleidleisiau a Liz Truss yn dod yn drydydd. Yr un oedd y patrwm yn yr ail rownd hefyd.

Bydd y pleidleisio'n parhau tan y bydd dau ymgeisydd ar ôl, cyn i aelodau'r blaid ar lawr gwlad ddewis yr ymgeisydd buddugol.

Darllenwch ragor yma.