Mae aelodau seneddol Ceidwadol wedi bod yn bwrw eu pleidlais dros arweinydd eu plaid yn y rownd ddiweddaraf o'r ornest ddydd Iau.

Mae chwech o enwau yn y ras, ac fe wnaeth y blychau pleidleisio gau am 13:30, gyda'r disgwyl y bydd canlyniad yn cael ei gyhoeddi am 15:00.

Hon yw'r ail rownd o bleidleisio, a'r tro hwn nid oes yn rhaid i'r chwe ymgeisydd sicrhau nifer benodol o bleidleisiau i aros yn y ras.

Fe fydd yr ymgeisydd gyda'r nifer isaf o bleidleisiau yn colli, a phum ymgeisydd yn parhau.

Y chwech sydd yn aros i glywed eu tynged yw:

• Kemi Badenoch 
• Suella Braverman 
• Penny Mordaunt 
• Rishi Sunak 
• Liz Truss 
• Tom Tugendhat 

Fe lansiodd yr Ysgrifennydd Tramor Liz Truss ei hymgyrch yn gynharach yn y dydd, gan ddweud y byddai'n barod i fod yn brif weinidog o'r diwrnod cyntaf.

Y cyn-Ganghellor Rishi Sunak oedd yn fuddugol yn y rownd gyntaf o bleidleisio, gyda Penny Mordaunt yn sicrhau'r ail nifer uchaf o bleidleisiau a Liz Truss yn dod yn drydydd.