Newyddion S4C

Cân 'Yma o hyd' gan Dafydd Iwan ar frig siart iTunes

Cân 'Yma o hyd' gan Dafydd Iwan ar frig siart iTunes

NS4C 08/06/2022

Mae anthem answyddogol cefnogwyr pêl-droed Cymru, sef 'Yma o Hyd' gan Dafydd Iwan wedi cyrraedd y brig yn siart iTunes brynhawn dydd Mercher.

Cafodd y gân ei chanu ddwywaith yn Stadiwm Dinas Caerdydd gan yr artist eiconig brynhawn dydd Sul - unwaith cyn herio Wcráin, ac yna eto ar ôl y chwiban olaf wedi i Gymru sicrhau eu lle yng Nghwpan y Byd am y tro cyntaf ers 1958.

Wrth siarad â Newyddion S4C, dywedodd Dafydd Iwan bod y gân wedi dod yn “symbol o ysbryd y gêm erbyn hyn.

“Ac mae o yn wych o beth. Nid oherwydd mai fi sydd wedi ei sgwennu a’i chanu hi, ond gan fod ‘na gân Gymraeg yn cael ei pherchnogi gan dîm cenedlaethol pêl droed Cymru,” ychwanegodd.

‘Deall arwyddocâd y geiriau’

Ysgrifennodd Dafydd Iwan y gân yn dilyn cyfnod cythryblus yn wleidyddol i Gymru yn yr 1980au, ac mae’r geiriau yn cydio yn y syniad bod modd ‘goroesi er gwaethaf pawb a phopeth’.

Yn ôl Dafydd Iwan, mae’r tîm a’r cefnogwyr wedi dod i ddeall arwyddocâd y geiriau'n llawn erbyn hyn.

“I rywbeth fod yn anthem mae rhaid cael sawl elfen, ac mae’n ffitio felly de."

Dywedodd hefyd fod y perfformiad yn rhan o’r broses o “wneud y Gymraeg yn rhan o fywyd Cymru yn yr ystyr llawnaf posib.

“Mae ‘na rwbath sydd yn y gân sydd yn taro deuddeg gyda phobl sydd ddim yn deall y geiriau a dwi ddim yn siŵr iawn sut ma’ hynny yn gweithio,” meddai.

This website uses cookies to ensure you get the best experience on our website.