Mae arlywydd a phrif weinidog y Ffindir wedi cyhoeddi eu bod o blaid eu gwlad yn ymuno gyda NATO.

Yn dilyn ymosodiad Rwsia ar Wcráin, roedd cryn ddyfalu y byddai'r wlad a Sweden yn agosáu at benderfyniad i ymuno gyda'r gynghrair filwrol.

Mewn datganiad ar y cyd fore dydd Iau, dywedodd yr Arlywydd Sauli Niistro a'r Prif Weinidog Sanna Marin y byddai aelodaeth y Ffindir o NATO "yn cryfhau diogelwch y Ffindir":

"Yn ystod y gwanwyn hwn, mae trafodaeth bwysig am aelodaeth posib y Ffindir gyda NATO wedi cael ei chynnal. Roedd angen amser ar y Senedd a'r gymdeithas i sefydlu barn ar y mater.

"Roedd angen amser ar gyfer cyswllt agos rhyngwladol gyda NATO a'r gwledydd sydd yn aelodau, a hefyd gyda Sweden. Roeddem am roi'r gofod angenrheidiol i'r drafodaeth yr oedd ei angen."

Joint statement by the President of the Republic and Prime Minister of Finland on Finland's NATO membership:https://t.co/0xJ9OE70Cw@TPKanslia I @niinisto I @MarinSanna pic.twitter.com/ZviOgZ6v1n

— Finnish Government (@FinGovernment) May 12, 2022

Ychwanegodd y ddau: "Gan fod y foment o wneud penderfyniad yn agos, rydym yn lleisio ein barn gyfartal a hefyd er gwybodaeth i'r grwpiau a'r pleidiau seneddol.

"Byddai aelodaeth o NATO yn cryfhau diogelwch y Ffindir...Rhaid i'r Ffindir wneud cais am aelodaeth i NATO heb unrhyw oedi."

Mae'r Ffindir yn rhannu ffin o 830 milltir gyda Rwsia, ac roedd rhyfel fer rhwng y ddwy wlad yn 1939-40 yn adlais o ymosodiad Rwsia ar Wcráin eleni.

Ar ddechrau'r Ail Ryfel Byd fe ymosododd Rwsia ar y Ffindir gan ddechrau 'Rhyfel y Gaeaf', gyda lluoedd Rwsia heb baratoi ar gyfer y gaeaf caled a daearyddiaeth y wlad.

Wedi tri mis o ymladd, gorfodwyd y Ffindir i arwyddo cytundeb gyda Moscow, gan golli 11% o'i thiriogaeth o ganlyniad. Fyth ers hynny mae'r wlad wedi mabwysiadu polisi o fod yn niwtral gan osgoi ymuno gyda NATO hyd yma.

Prif Lun: Lluoedd arfog y Ffindir