Mae sylwebydd pêl-droed blaenllaw wedi dweud fod colli hawliau darlledu gemau pêl-droed Cymru yn "ergyd anferth i S4C".

Mewn cyfweliad â Newyddion S4C, dywedodd Nic Parry fod y penderfyniad yn un sydd "ag oblygiadau enfawr".

Daw ei sylwadau wedi cyhoeddiad fore Mercher fod y sianel wedi colli'r hawliau i ddarlledu gemau pêl-droed Cymru wedi i UEFA arwyddo cytundeb newydd gyda chwmni o Norwy.

"Sa ddim amheuaeth, a ma' na wybodusion llawer mwy na fi o fewn y sianel all gadarnhau hyn, ond ma' hon yn ergyd anferth i S4C," meddai Mr Parry.

"Fel cefnogwr dwi'n ei weld o'n siomedig, ond dwi'n dueddol o fynd i'r gemau.  Fel sylwebydd, fydde fe'n ddiwedd era i fi a fydde fo'n dristwch ofnadwy petai'r cyfle yn dod, ar ôl bron i 40 mlynedd o gael darlledu ar bêl-droed Cymru, petai hwnna'n dod i ben."

"Ond nid fi ond y cefnogwyr fydde'n diodde' fwya'", ychwanegodd.

'Siomedig gyda'r newyddion'

O 2024 ymlaen, bydd gemau Cymru yn cael eu darlledu ar wasanaeth Viaplay yn unig. 

Bydd gan y gwasanaeth ffrydio, sydd yn lansio yn y DU cyn diwedd 2022, yr hawliau i ddarlledu gemau Cymru am bedair blynedd. 

Mae'r cytundeb yn cynnwys yr ymgyrch ragbrofol ar gyfer y Cwpan y Byd yn 2026 ac Euro 2028, yn ogystal â gemau Cymru yng Nghynghrair y Cenhedloedd ac unrhyw gemau eraill. 

Fel rhan o'r cytundeb, mae Viaplay wedi ymrwymo i ddarlledu'r gemau gyda sylwebaeth trwy gyfrwng y Gymraeg. 

Mae rhai o gefnogwyr y Wal Goch wedi ymateb yn chwyrn i’r cyhoeddiad ar gyfryngau cymdeithasol.

Dwi'n annog cefnogwyr pel-droed @Cymru i gefnogi @NoelMooney13 yn ei ymdrechion i gadw gemau Cymru yn fyw ar @sgorio @S4C .
Rhannwch os gwelwch yn dda.
Diolch. https://t.co/WR5hw3Jf1r

— Llion Jones (@LlionJones8) April 27, 2022

Dim mwy o Malcolm a Nic? https://t.co/RFC2VNqI0P pic.twitter.com/6v1QcqVKfK

— Aled Hughes 🏴󠁧󠁢󠁷󠁬󠁳󠁿 (@boimoel) April 27, 2022

Dywedodd llefarydd ar ran S4C: “Yn amlwg mae S4C yn siomedig gyda’r newyddion yma gan UEFA heddiw. Mae S4C yn trafod gyda Cymdeithas Pêl-droed Cymru er mwyn cadarnhau’r sefyllfa o ran sylwebaeth Gymraeg.

"Ni fydd S4C yn gwneud unrhyw sylw ar drafodaethau masnachol," ychwanegodd y llefarydd.

Bora da. UEFA sell the centralised rights for all 55 national associations in Europe. We are in discussions with them re Welsh language, promotion of domestic game internationally, free to air matches of the @Cymru national teams etc. Will update ASAP. https://t.co/pxeNlC6U5X

— Noel Mooney (@NoelMooney13) April 27, 2022

Yn dilyn y newyddion, fe ddywedodd Prif Weithredwr Cymdeithas Bêl-droed Cymru, Noel Mooney, fod trafodaethau'n parhau rhwng y gymdeithas a UEFA o ran yr iaith Gymraeg.

Llun: Asiantaeth Huw Evans