Porthladd Caergybi 'ar gau dros dro' ar ôl i fferi gael trafferthion angori
Mae Porthladd Caergybi ym Môn ar gau dros dro wedi digwyddiad yno fore Mercher.
Mewn datganiad, dywedodd cwmni Stena Line wrth Newyddion S4C fod "digwyddiad angori wedi digwydd wrth i fferi y Stena Estrid ddocio ym Mhorthladd Caerygbi.
"Mae'r teithwyr wedi dod oddi ar y llong ac mae'r digwyddiad yn destun ymchwiliad ar hyn o bryd."
Ychwanegodd y cwmni fod Porthladd Caergybi ar gau dros dro a fod y cwmnïau fferi yn hysbysu eu cwsmeriaid am yr hyn sydd wedi digwydd.
Dywedodd Prif Weithredwr Cyngor Môn, Dylan J Williams eu bod nhw mewn cysylltiad rheolaidd gyda'r Awdurdod Porthladd "ac yn obeithiol na fydd y porthladd wedi cau am gyfnod sylweddol".
"Fodd bynnag, mae'r Cyngor Sir yn cydweithio gyda phartneriaid i geisio lliniaru effeithiau lleol os bydd y porthladd ar gau am gyfnod estynedig," meddai.
Dywedodd Ysgrifennydd y Cabinet dros Drafnidiaeth a Gogledd Cymru, Ken Skates: "Rwyf wedi cyfarfod â Stena sef awdurdod y Porthladd ac sydd yn gyfrifol am y seilwaith heddiw.
"Mae'r porthladd ar gau dros dro tra bod Stena yn cynnal ymchwiliad i'r digwyddiad ac fe fyddan nhw yn darparu diweddariad yn ddiweddarach heddiw. Fe fyddaf i yn parhau mewn cyswllt agos â nhw."
'Testun pryder'
Wrth ymateb i'r digwyddiad, dywedodd Llinos Medi, Aelod Seneddol Plaid Cymru dros Ynys Môn: "Mae'n destun pryder gweld Porthladd Caergybi ar gau unwaith eto oherwydd problem angori.
"Ar ôl problemau dro ar ôl tro, mae'n hanfodol bod gennym hyder yng ngwydnwch hirdymor y porthladd."
Ychwanegodd yr Aelod o’r Senedd dros Ynys Môn, Rhun ap Iorwerth AS: "Mae'n bryderus ein bod ni mewn sefyllfa, unwaith eto, lle mae Porthladd Caergybi wedi gorfod cau oherwydd damwain.
"Bydd teithwyr, cludwyr, a busnesau lleol yng Nghaergybi yn poeni ac yn rhwystredig am y cyhoeddiad, ac rwy'n eu hannog i gysylltu â mi os gallaf fod o unrhyw gymorth.
"Byddaf yn cysylltu â Stena Line a Llywodraeth Cymru ar frys i ddeall beth sy'n cael ei wneud i ailagor y porthladd cyn gynted â phosibl. Yn dilyn nifer o ddigwyddiadau mae angen sicrwydd cadarn arnom ynghylch gwydnwch hirdymor y porthladd."
Canslo teithiau fferi
Mae cwmni Irish Ferries yn adrodd bod y fferi rhwng Dulyn a Chaergybi am 13.45 wedi'i chanslo, tra bydd y gwasanaeth 20.55 bellach yn gadael am 19.45.
Dywedodd y cwmni brynhawn Mercher eu bod yn disgwyl i'r sefyllfa gael ei ddatrys yn ystod y prynhawn ac y dylai gwasanaethau ddychwelyd i'r arfer am 19.30.
Mae Irish Ferries wedi ymddiheuro i gwsmeriaid sydd wedi'u heffeithio am y "tarfu y tu hwnt i'w rheolaeth", gan ychwanegu y byddai'r cwmni yn cysylltu gyda'r rhai sydd wedi'u heffeithio.
Dywedodd An Post, Gwasanaeth Post Gweriniaeth Iwerddon, mewn datganiad ddydd Mercher eu bod "ar ddeall fod y porthladd yn gweithredu gan ddefnyddio un angorfa yn unig ac ar hyn o bryd, nid oes unrhyw gychod yn gallu mynd i mewn nac allan o'r porthladd."
Ychwanegodd y gwasanaeth eu bod yn disgwyl y bydd y digwyddiad yn effeithio ar wasanaethau fferi yn cael eu canslo ddydd Mercher yn ogystal â chyflenwadau rhyngwladol dros y dyddiau nesaf.
Yn Rhagfyr 2024, fe gafodd yr holl wasanaethau fferi yn y porthladd, sy’n eiddo i Stena Line, eu canslo ar ôl i Storm Darragh ddifrodi dwy derfynfa yn y porthladd.
Bu oedi wrth ddosbarthu parseli dros gyfnod y Nadolig hwnnw, ac fe gafodd miloedd o bobl oedd yn teithio adref eu heffeithio.
Fe gafodd y porthladd ei ailagor yn llawn fis Gorffennaf y llynedd, ar ôl agor yn rhannol fis Ionawr.
Beirniadaeth
Fe wnaeth adroddiad a gyhoeddwyd ym mis Ebrill 2025 gan Bwyllgor Economi, Masnach a Materion Gwledig y Senedd feirniadu ymateb Llywodraeth Cymru i drafferthion Porthladd Caergybi ar ddiwedd 2024 a dechrau 2025.
Roedd y pwyllgor o'r farn y gallai'r digwyddiad fod wedi'i reoli'n well pe bai’r Ysgrifennydd Cabinet penodol yn arwain ymateb Llywodraeth Cymru.
Beirniadodd y pwyllgor y ffaith nad oedd eu tystion yn siŵr pwy yn Llywodraeth Cymru oedd yn gyfrifol am ymdrin â chau’r porthladd.
Roedd dryswch ai'r Ysgrifennydd Trafnidiaeth neu Ysgrifennydd yr Economi oedd yn gyfrifol, meddai'r adroddiad.
Llun: Dafydd Edwards
