Roedd yr heddlu wedi gweithio gyda Face Lab ym Mhrifysgol John Moores yn Lerpwl i gynhyrchu delwedd o wyneb y dyn sydd heb ei adnabod eto, yn y gobaith o gyrraedd rhywun a all helpu i ddarparu gwybodaeth yn yr achos.

Fe dderbyniodd Heddlu Dyfed-Powys alwad 999 ychydig cyn 08.30 ar 18 Hydref 2024, yn adrodd bod corff dyn wedi cael ei weld yn y dŵr yng nghronfa ddŵr Claerwen gan gerddwr. 

Fe aeth y gwasanaethau brys i'r lleoliad oedd mewn rhan anghysbell o'r gronfa ddŵr, a dod o hyd i'r corff. 

Daeth archwiliad post mortem i'r casgliad bod y dyn rhwng 30 a 60 oed, yn wyn, ac yn chwe troedfedd o daldra. 

Y gred yw bod y corff wedi bod yn y dŵr ers hyd at 12 wythnos. 

Doedd dim eiddo personol o amgylch y gronfa ddŵr a dim oriawr na gemwaith yn cael eu gwisgo gan y dyn. 

Yr unig eitem oedd ar gael i swyddogion wneud ymholiadau oedd siwt wlyb, neu 'wetsuit'.

Dywedodd y Ditectif Arolygydd Anthea Ponting, sydd wedi arwain yr ymchwiliad: “Rydym wedi cael nifer sylweddol o adroddiadau drwy ganolfan reoli ein heddlu a phorth cyhoeddus ar gyfer digwyddiadau mawr, ac rydym yn gweithio ein ffordd drwyddynt ac yn eu hasesu’n unigol.

“Mae’r wybodaeth yn amrywio o enwau penodol unigolion y byddwn yn eu gwirio, i adroddiadau mwy amwys a allai gymryd peth amser i’w dilyn.

“Waeth beth fo lefel y manylder sy'n cael ei dderbyn, byddwn yn blaenoriaethu ac yn edrych ar bob adroddiad i benderfynu pa ymholiad rhesymol y gellir eu cynnal.

“Rydym yn ddiolchgar i bawb sydd wedi darparu gwybodaeth hyd yn hyn, a hoffwn annog unrhyw un sy’n teimlo y gallent helpu nad ydynt wedi bod mewn cysylltiad â ni eto, i gysylltu.”