Mae cyn-reslar wedi dweud bod penderfyniad y World Wrestling Entertainment (WWE) i gynnal digwyddiad yn Stadiwm y Principality yn medru "rhoi Cymru ar y map." 

Cafodd y cyhoeddiad ei wneud y bydd WWE, sydd yn gyfrifol am hybu gornestau reslo byd-eang, yn cynnal ei ddigwyddiad cyntaf ym Mhrydain ers 30 mlynedd yng Nghaerdydd ym mis Medi eleni. 

Mae WWE yn denu miliynau o wylwyr ar draws y byd ac wedi lansio gyrfaoedd nifer o'r perfformwyr enwocaf fel Dwayne 'The Rock' Johnson a John Cena. 

Roedd Barri Griffiths yn perfformio gyda'r WWE yn yr Unol Daleithiau rhwng 2009 a 2014. 

Dywedodd y reslar o Dremadog yng Ngwynedd ei fod yn hapus iawn i weld y penderfyniad i ddod a WWE i Gymru. 

"Iddyn nhw dewis Cymru mae hynny'n brilliant," meddai. 

Image

"Mae'n nod i Gymru, bod Cymru yn gallu denu mewn sioeau mawr fel hyn, o ni'n hapus iawn i glywed." 

"Neis i gael y pethau fel yma yng Nghymru, mae jyst yn dangos fel pobl Cymraeg, dyma be sydd yn gallu dod i Gymru." 

Mae Barri yn gobeithio y gall y digwyddiad ddenu mwy o sylw rhyngwladol i Gymru. 

Yn ôl Barri, roedd ei Gymreictod yn rhan bwysig o'i berfformiadau gyda WWE ac yn meddwl y gall y sioe yng Nghaerdydd adeiladu ar yr hyn wnaeth i ddangos diwylliant Cymru i gefnogwyr reslo. 

"Y ffaith bod o yn Gymru, mae pobl yn mynd i sbïo 'O mae yng Nghymru? Ble ma fanno?'

"Mae pobl ishe gwybod am ble mae'r sioe yn digwydd." 

"Dwi'n siŵr fyd bydd miloedd o bobl yn dod drosodd o America i Gaerdydd i weld y sioe." 

"Sioe enfawr ydy o, ac mae miliynau yn ddwli watsiad o." 

Llun: Miguel Discart / Flickr