Covid-19: Dim torfeydd mewn gemau chwaraeon o ddydd Sul ymlaen
Mae Llywodraeth Cymru wedi cyhoeddi y bydd digwyddiadau chwaraeon yn cael eu cynnal heb dorfeydd am y tro, mewn ymgais i geisio rheoli lledaeniad Covid-19.
Bydd y mesurau newydd ar gyfer chwaraeon dan do ac awyr agored yn dod i rym o 26 Rhagfyr ymlaen.
Daw'r cyhoeddiad yn dilyn cynnydd sylweddol yn y nifer yr achosion o'r amrywiolyn Omicron yng Nghymru.
Cafodd 163 achos newydd o'r amrywiolyn eu cofnodi yng Nghymru ddydd Llun, gan ddod â chyfanswm yr achosion i 435.
Mae cyfradd heintio cyffredinol Covid-19 hefyd wedi cynyddu yng Nghymru gydag 548.4 achos ym mhob 100,000 o bobl, wrth i 6,796 o achosion newydd gael eu cofnodi ddydd Llun.
Mae gêm bêl-droed rhwng Dinas Caerdydd a Coventry City a'r gêm rygbi ddarbi rhwng y Gweilch a'r Dreigiau - oedd fod i gael ei chwarae ar ddydd San Steffan - eisoes wedi'u gohirio oherwydd achosion o'r feirws ymysg y timau.
'Siomedig iawn'
Mae cynnal gemau chwaraeon tu ôl i ddrysau caeedig eto yn "siomedig iawn", yn ôl un o ranbarthau Cymru.
Dywed y Scarlets bod y cyhoeddiad yn "ergyd ariannol sylweddol arall" i'r clwb ond y byddan nhw bob amser yn blaenoriaethu iechyd eu cymuned.
Dywedodd Phil Morgan, Prif Swyddog Gweithredol y Scarlets: "Mae hwn yn siomedig iawn i ni gyd - chwaraewyr, staff, cefnogwyr a phartneriaid masnachol, sydd wedi dangos teyrngarwch anhygoel i ni dros y 18 mis diwethaf.
"Mae gemau darbi y gwyliau, yn enwedig ein gêm gartref yn erbyn y Gweilch, bob amser yn achlysuron gwych ac roeddwn yn disgwyl dau o dorfeydd mwyaf y tymor ar gyfer gemau'r Gweilch a'r Dreigiau.
"Tra y bydd y newyddion hwn yn ergyd ariannol sylweddol arall i'r busnes, byddwn bob amser yn blaenoriaethu iechyd a diogelwch cymuned y Scarlets.
"Byddwn yn parhau i weithio'n agos gyda Llywodraeth Cymru a gobeithio, pan mae'n ddiogel, y byddwn yn gallu croesawu cefnogwyr yn ôl i Barc y Scarlets yn fuan."
Yn ôl Rygbi Caerdydd, fe gyflwynon nhw gais i'r Bencampwriaeth Rygbi Unedig i ohirio'u gêm ddarbi yn erbyn y Scarlets tan i gefnogwyr allu dychwelyd i'r stadiwm, ond fod y cais hwnnw wedi ei wrthod.
Mae Cadeirydd y Dreigiau, David Buttress, wedi galw'r newyddion yn "ofnadwy" ac yn ddinistriol i rygbi proffesiynol a chwaraeon.
Nobody should underestimate this. It is devastating for professional rugby and sport. We have done everyone to support, comply and drive / support Covid community initiatives.
— David Buttress (@davidjusteat) December 21, 2021
I may not be thanked for being frank, but this is horrendous news for us. This is brutal news. https://t.co/1yb0ukejmB
Ni fydd cefnogwyr yn y Cae Ras ar gyfer gêm gartref Wrecsam yn erbyn Solihull Moors ar Ŵyl San Steffan.
Mewn datganiad, dywedodd llefarydd ar ran CPD Wrecsam fod y penderfyniad yn un "siomedig".
"Rydym yn siomedig iawn na fydd cefnogwyr yn gallu mynychu ein gêm Gŵyl San Steffan yn y Cae Ras, ond rydym yn deall pam bod y penderfyniad wedi ei wneud."
'Diogelu iechyd pobl'
Bydd Cronfa Chwaraeon gwerth £3m ar gael i geisio lleddfu'r effaith economaidd ar y clybiau sydd yn cael eu heffeithio gan y mesurau newydd.
Dywedodd Gweinidog yr Economi, Vaughn Gething: "Mae digwyddiadau chwaraeon dros gyfnod y Nadolig yn un o uchafbwyntiau mawr y flwyddyn. Yn anffodus, mae'r amrywiolyn Omicron newydd yn ddatblygiad sylweddol yn y pandemig a gallai achosi nifer fawr o heintiau."
“Mae angen i ni wneud popeth o fewn ein gallu i ddiogelu iechyd pobl a rheoli lledaeniad y feirws ofnadwy yma.
“Drwy gydol y pandemig rydym wedi dilyn cyngor gwyddonol ac iechyd y cyhoedd i gadw pobl yn ddiogel. Mae'r cyngor yn glir - mae angen i ni weithredu nawr fel ymateb i fygythiad omicron.
“Bydd torfeydd yn dod yn ôl cyn gynted â phosib. Rydyn ni eisiau i bawb fod yma i fwynhau eu hoff chwaraeon.”
Mae'r Prif Weinidog, Mark Drakeford, eisoes wedi cyflwyno mesurau newydd yng Nghymru mewn ymateb i'r amrywiolyn, gan gyhoeddi y bydd clybiau nos yn cau o 27 Rhagfyr ymlaen.
Mewn ymateb i’r cyhoeddiad, dywedodd arweinydd y Ceidwadwyr Cymreig, Andrew RT Davies mai "nad dyma'r ffordd i wneud pethau".
Ychwanegodd bod "teuluoedd, gweithwyr, busnesau a sefydliadau yn haeddu cyfathrebu clir gan lywodraethau o bob math yn ystod cyfnod y Nadolig a'r flwyddyn newydd.
"Mae'r Ceidwadwyr Cymreig yn dal i gredu y dylai cyfyngiadau ond gael eu cyflwyno yn seiliedig ar y data cryfaf posib, ac fel yr opsiwn olaf er mwyn gwarchod y GIG."