Mae Heddlu'r De wedi cyhoeddi enw'r dyn a fu farw yn y Barri nos Lun, wrth i swyddogion barhau i holi dau lanc ar amheuaeth o'i lofruddio.

Roedd Kamran Aman yn 38 oed, ac yn dad i un plentyn.

Mae dau lanc 16 ac 17 oed o Lanilltud Fawr, Bro Morgannwg wedi eu harestio ac maen nhw yn cael eu cadw yn y ddalfa.

Mae teulu Mr Aman yn parhau i gael eu cefnogi gan swyddogion arbenigol. 

Fe gafodd yr heddlu eu galw wedi adroddiadau fod person wedi ei drywanu ar Heol y Barri ychydig cyn hanner nos. 

Mae ditectifs yn apelio ar unrhyw un â gwybodaeth i gysylltu â'r heddlu. 

Dywedodd y Ditectif Uwch-arolygydd Mark O’Shea, o Dîm Troseddau Mawr yr Heddlu: “Mae ymholiadau helaeth yn parhau wrth i ni sefydlu’r digwyddiadau trasig a ddigwyddodd nos Lun. Mae ein meddyliau gyda theulu a ffrindiau Kamran Aman.

"Mae cordonau heddlu a ffyrdd wedi cau yn parhau, a hoffwn ddiolch i'r gymuned am eu cefnogaeth a’u dealltwriaeth barhaus wrth i ni symud ymlaen â’r ymchwiliad."