Bydd Parc Cenedlaethol Eryri yn dechrau plannu 5,000 o goed yr wythnos hon.

Fel rhan o Wythnos Genedlaethol Coed a dathliadau pen-blwydd y Parc yn 70 bydd y coed yn cael eu plannu ar hyd a lled Parc Cenedlaethol Eryri.

Coed brodorol cynhenid fydd yn cael eu plannu, sy’n cynnwys cymysgedd o dderw, bedw a chriafol a dyfwyd o had lleol ym meithrinfa goed Awdurdod y Parc ym Mhlas Tan y Bwlch.

‘O fudd i’r amgylchedd’

Dywedodd Rhydian Roberts, Swyddog Coedwigaeth Awdurdod y Parc:“Dyma ffordd arbennig o ddathlu pen-blwydd y Parc yn 70 oed gan ei fod yn rhywbeth fydd o fudd i’r amgylchedd naturiol yn ogystal â bod yn nodwedd fydd yn dathlu Parc Cenedlaethol Eryri am ddegawdau, neu ganrifoedd i ddod gobeithio!”

Yn ôl y Parc, maent yn blaenoriaethu’r angen i blannu coed gan fod llawer o'r stoc hynafol yn cyrraedd diwedd eu hoes a’r bygythiad sy’n eu hwynebu yn sgil clefyd coed.

Ychwanegodd llefarydd y bydd y coed yn storio carbon, gwella ansawdd aer a lliniaru effaith glaw trwm - ac yn gwarchod bioamrywiaeth gan eu bod yn darparu cynefin cysgodol a diogel i fywyd gwyllt. 

Mae hi'n #WythnosGoedGenedlaethol. 🎉

Ers 1975, mae'r digwyddiad arbennig hwn wedi ein hannog ni i ddathlu ein hamgylchedd hyfryd - a pa ffordd well i wneud hyn na phlannu coed newydd?

Cofiwch ddilyn ein cyfryngau cymdeithasol am ddiweddariadau o'r gwaith dros yr wythnos. 💚 pic.twitter.com/IJNkV67oHb

— Y Parc Cenedlaethol (@croesoeryri) November 28, 2021

Er mwyn helpu gyda’r gwaith plannu, mae gwahoddiad i bob un Cyngor Cymuned o fewn ac ar gyrion y Parc Cenedlaethol i dderbyn 70 o goed i’w plannu o fewn eu plwyf.

Gall unrhyw un sy’n byw o fewn neu ar gyrion y Parc gysylltu gyda’r os hoffent dderbyn coed i’w plannu fel rhan o’r prosiect.

Bydd pob un llecyn o goed neu goeden unig a blennir yn cael ei nodi â phlac dathliadol arbennig.