Mae Uwchgynhadledd newid hinsawdd COP26 wedi parhau am ddiwrnod ychwanegol ddydd Sadwrn oherwydd anghytuno dros y cytundeb terfynol.

Roedd y gynhadledd i fod i gloi am 18:00 ddydd Gwener 12 Tachwedd.

Ond, dywedodd Llywydd yr Uwchgynhadledd, Alok Sharma bod angen “adolygu’r cytundeb” dros nos gan fod ymgynghori rhwng gwledydd “yn dal i barhau”.

Un o'r pwyntiau sy'n cael ei adolygu yw'r addewidion ynghylch tanwyddau ffosil. 

Mae arweinwyr y byd wedi bod yn y gynhadledd yng Nglasgow dros y bythefnos ddiwethaf i drafod sut i fynd i'r afael â newid hinsawdd.

Mae rhai ymgyrchwyr yn dweud nad yw'r trafodaethau yn "mynd yn ddigon pell."

Image

Roedd Prif Weinidog y Deyrnas Unedig Boris Johnson a Phrif Weinidog Cymru Mark Drakeford ymhlith yr arweinwyr sydd wedi bod yn rhan o'r trafodaethau yng Nglasgow.

Mae disgwyl y bydd cyfres o addewidion wedi eu penderfynu mewn cytundeb terfynol ddydd Sadwrn ar ôl cyfarfod yn y bore.

Beth sydd wedi cael ei drafod?

Un o brif dargedau COP26 yw bod gwledydd y byd yn ymrwymo i gadw tymheredd cynhesu byd eang o dan 1.5°c.

Mae prif addewidion y ddogfen ddrafft  yn cynnwys sicrhau bod gwledydd yn cyflwyno cynlluniau i leihau carbon ymhellach erbyn 2022 ac i sicrhau "o leiaf $100bn y flwyddyn" i gefnogi gwledydd llai i ddatgarboneiddio.

Mae'r ddogfen hefyd yn galw am ddod â'r defnydd o lo a thanwydd ffosiledig i ben. 

Rhai o'r pethau sydd eisoes wedi eu penderfynu yw:

• y bydd tua 40 o wledydd yn gweithio i stopio buddsoddi mewn pwer glo newydd
• bod mwy na 100 o wledydd wedi addo rhoi diwedd ar ddatgoedwigo erbyn diwedd 2030.
• bod 100 o wledydd wedi addo i dorri allyriadau nwy methan gan 30% erbyn 2030.

Ond yn ôl y Llywydd, Alok Sharma, mae angen “adolygu geiriad” y cytundeb.

Dywedodd ysgrifennydd y Llywydd mewn datganiad ar y cyfryngau cymdeithasol nos Wener: “Mae fy nhîm a finnau nawr yn ymgynghori’n ddwys gyda grwpiau a gwledydd mewn ymdrech i adlewyrchu’r safbwyntiau sydd wedi eu rhannu, dod o hyd i’r cydbwysedd cywir a datblygu testunau sydd wedi eu hadeiladu trwy’r cydweithio.”

“Rwy’n diolch yn fawr i bawb am yr ysbryd o gyd-weithio sy’n parhau i lifo i mewn i heno.”

'ddim yn mynd ddigon pell'

Mae rhai ymgyrchwyr yn poeni na fydd y ddogfen derfynol yn ddigon i fynd i'r afael newid hinsawdd. 

Wrth siarad gyda Newyddion S4C, dywedodd Rhian Barrance o Wrthryfel Dyfodiant bod addewidion "ddim yn mynd yn ddigon pell".

"Mae 25 ohonyn nhw wedi bod o'r blaen, felly mae'n anodd ymddiried yn ein harweinwyr i wireddu'r addewidion yma."

"Mae 25 ohonyn nhw wedi bod o'r blaen, felly mae'n anodd ymddiried yn ein harweinwyr i wireddu'r addewidion yma."

Wrth i COP26 ddiryw i ben mae ymgyrchwyr yn dweud bod yr addewidion "ddim yn mynd yn ddigon pell". pic.twitter.com/1VHzhPAuK9

— Newyddion S4C (@NewyddionS4C) November 12, 2021

Dilynwch wefan ac ap Newyddion S4C am y diweddaraf ddydd Sadwrn.

Llun: Paul Ellis / AFP