Bale i ennill ei ganfed cap dros Gymru yn erbyn Belarws
Fe fydd Gareth Bale yn ennill ei ganfed cap dros ei wlad wrth i Gymru herio Belarws yng Nghaerdydd.
Dyw'r ymosodwr heb chwarae am dros ddau fis oherwydd anaf i'w linyn y gar ond mae Rob Page wedi'i gynnwys yn y tîm cychwynnol.
😍💯 @GarethBale11 🏴 https://t.co/GzaLWnH4CZ pic.twitter.com/XpzfyaZ6QD
— Sgorio ⚽️ (@sgorio) November 13, 2021
Yn un o gewri pêl-droed Cymru, mae Bale wedi dychwelyd i'r garfan cyn gêm bwysicaf Cymru hyd yma yn eu hymgyrch i gyrraedd y Cwpan y Byd yn 2022.
Yn gapten ar y tîm hefyd, mae wedi ysbrydoli sawl canlyniad anhygoel dros y blynyddoedd ac fe fydd y cefnogwyr yn gobeithio y gallai helpu sicrhau buddugoliaeth bwysig arall yn Stadiwm Dinas Caerdydd.
Llwyddodd Bale i achub gobeithion Cymru'r tro diwethaf iddyn nhw chwarae Belarws ym mis Medi - gan sgorio gôl yn y munud olaf i sicrhau tair o goliau iddo'i hun a buddugoliaeth o 3-2.
Ond bydd rhaid i ddynion Rob Page ddysgu gwersi o'r gêm honno, gan eu bod ar ei hôl hi ar yr egwyl y noson honno wedi perfformiad siomedig.
Fe fydd y dynion mewn coch am fanteisio ar gyfle i godi i'r ail safle yn Grŵp E os daw buddugoliaeth dros y penwythnos.
Mae Cymru yn drydydd ar hyn o bryd, gyda'r Weriniaeth Siec un safle'n uwch ar wahaniaeth goliau ac wedi chwarae un gêm yn fwy.
Mae bron yn amhosib i Gymru orffen ar frig y tabl - mae Gwlad Belg bum pwynt ar y blaen ac yn teithio i Gaerdydd wythnos nesaf - ond mae sicrhau ail safle yn holl bwysig i'w ymdrechion i gyrraedd eu Cwpan y Byd cyntaf ers 1958.
Mae Cymru hefyd eisoes wedi sicrhau safle yn y gemau ail-gyfle oherwydd ei berfformiad yng Nghynghrair y Cenhedloedd.
Ond trwy orffen yn ail, bydd gan Gymru lwybr haws yn y gemau ail-gyfle yn ogystal â chwarae o flaen cefnogaeth frwd y Wal Goch adref.
Dywedodd chwaraewr canol cae Cymru, Joe Allen wrth Sgorio: "Erbyn hyn mae 'na digon o brofiad nawr o fod yn y sefyllfa 'ma fel chwaraewyr felly ni'n defnyddio profiad 'na i helpu ni.
"Tri phwynt yn y gêm gyntaf yw'r peth mwyaf pwysig... mae'n rhaid i ni cael targed o ennill bron pob gêm gallwn ni.
"Dyma ddwy gêm gallwn ni ennill, yn enwedig wrth ystyried ni'n chwarae gartref, o flaen ein torf."
Cymru v Belarws, Stadiwm Dinas Caerdydd - y gic gyntaf am 19:45. Gwyliwch ar S4C o 19:15.