Mae'r actores Brigitte Bardot wedi marw'n 91 oed yn Saint-Tropez.

Fe ddaeth yn enwog yn ystod 50au a 60au'r ganrif ddiwethaf am ei rhan mewn ffilmiau oedd yn cynnwys 'And God Created Woman', 'Naughty Girl', a 'The Bride Is Much Too Beautiful'.

Yn ddiweddarach yn ei bywyd fe wnaeth ymgyrchu dros hawliau anifeiliaid ar ôl ymddeol o fyd y ffilmiau yn 1973, gan sefydlu Sefydliad Brigitte Bardot er mwyn brwydro ar eu rhan.

“Rhoddais fy ieuenctid a’m harddwch i ddynion, rhoddaf fy noethineb a’m profiad i anifeiliaid,” meddai mewn un dyfyniad enwog yn adlewyrchu ar ei bywyd.

Mewn datganiad fore dydd Sul, dywedodd Sefydliad Brigitte Bardot: "Mae Sefydliad Brigitte Bardot yn cyhoeddi gyda thristwch mawr farwolaeth ei Sylfaenydd a'i Llywydd, Mrs Brigitte Bardot, actores a chantores o fri fyd-eang, a ddewisodd roi'r gorau i'w gyrfa fawreddog er mwyn ymroi ei bywyd a'i hegni i les anifeiliaid a'i Sefydliad.

"Bydd y sefydliad yn parhau, yn fwy nag erioed, i hyrwyddo gwaith Brigitte Bardot."

Yn ei mamwlad, roedd yn cael ei hadnabod yn syml fel 'BB', cymaint oedd ei henwogrwydd.

'Chwedl y ganrif'

Wrth roi teyrnged iddi, dywedodd Arlywydd Ffrainc, Emmanuel Macron mai hi oedd "chwedl y ganrif."

"Ei ffilmiau, ei llais, ei gogoniant disglair, ei llythrennau cyntaf, ei thristwch, ei hangerdd hael dros anifeiliaid... roedd Brigitte Bardot yn ymgorffori bywyd o ryddid.

"Bodolaeth Ffrengig, disgleirdeb byd-eang. Cyffyrddodd â ni. Rydym yn galaru chwedl y ganrif."

Cafodd Brigitte Anne-Marie Bardot ei geni ym Mharis yn 1934 i deulu llewyrchus, gan hyfforddi i fod yn falerina ac actores.

Daeth i enwogrwydd yn gyntaf yn 1952, a hynny ym myd y ffilm, cyn recordio caneuon poblogaidd yn ddiweddarach.

Fe ddaeth i ymgorffori agweddau newydd at rywioldeb a rhyddid yn ystod y 1960au.

Dywedodd Arlywydd Ffrainc Charles De Gaulle ar y pryd ei bod yng nghanol y ganrif ddiwethaf wedi bod yr un mor bwysig i Ffrainc o ran ei hallforion a chwmni ceir Renault, cymaint oedd ei dylanwad a'i phoblogrwydd.

Yn ddiweddarach yn ei bywyd fe gafodd ei beirniadu am wneud sylwadau homoffobig ac annog casineb hiliol.