Mae perchennog salon sydd yn arbenigo mewn plethu a steiliau gwallt du yn galw ar y diwydiant gwallt i fod yn fwy cynhwysol. 

Dywedodd Sian Jones wrth gyfres GRID ar Hansh, nad yw pobl yn sylweddoli pa mor angenrheidiol yw cael mynediad i salonau sy’n gallu trin steiliau gwallt du.

Daw hyn ar ôl i adolygiad diweddar o’r Safonau Galwedigaethol Cenedlaethol ar gyfer trin gwallt ddweud y bydd hyfforddiant ar gyfer cymhwyster trin gwallt bellach yn cynnwys gwersi i ddatblygu sgiliau i weithio gyda gwallt du ac affro.

Image

Mae Sian Jones, 22, o Gaerdydd wedi bod yn trin gwallt ers tair blynedd ac agorodd ei salon cyntaf yng nghanol y ddinas ym mis Medi.

Dywedodd: “Rwy'n credu mai'r prif reswm pam y penderfynais ddechrau'r busnes yw oherwydd bod bwlch yn y farchnad. Nid oes llawer o leoedd yng Nghaerdydd sy'n cynnig gwasanaethau plethu. 

“Rwy'n credu dim ond fy hun a dau arall yng nghanol y ddinas sydd yn cynnig gwasanaethau plethu fel busnes iawn - rwy'n gwybod bod yna ddigon o bobl sy'n ei wneud o'u cartrefi, ond weithiau mae pobl eisiau dod i awyrgylch salon i gael eu gwallt wedi'i wneud.”

“Dydy pobl ddim yn sylweddoli pa mor angenrheidiol ydyn nhw.”

Mae myfyriwr ffasiwn ifanc yn ystyried pa mor gynhwysol yw’r diwydiant harddwch a sut mae diffyg cynrychiolaeth a hiliaeth wedi effeithio ar fenywod du o fewn y diwydiant yng Nghymru.

Gallwch wylio fideo @hanshs4c yn llawn yma ➡️ https://t.co/gUO10J9e7i pic.twitter.com/EVtK3l30Vu

— Newyddion S4C (@NewyddionS4C) October 14, 2021

Hyd at fis Medi 2021, nid oedd unrhyw golegau yng Nghymru yn cynnig cyrsiau trin gwallt ble mae addysg ar sut i drin gwallt du affro yn rhan graidd o'r cwricwlwm.

Gydag adolygiad diweddar yr Awdurdod y Diwydiant Gwallt a Harddwch, mae Sian yn edrych ymlaen i weld hynny'n newid.

“Mae’r training angen bod yna… Dwi wedi bod yn chwilio am gyrsiau i neud curly cuts ond does ddim yng Nghaerdydd heblaw os chi ishe mynd i goleg i neud e, ag yn gyntaf bydd angen i chi dysgu torri gwallt caucasian a mynd ar gefn eich hunain rili i ddysgu sut i dorri gwallt affro.

“Mae'n gwneud i chi feddwl, sut mae disgwyl i ni gael salonau i bobl ddu os nad oes neb yn barod i hyfforddi unrhyw un i allu gweithio ynddynt, yn y ddinas?”

Datgelodd astudiaeth 2017 gan Awdurdod y Diwydiant Gwallt a Harddwch fod tua 35,700 o salonau harddwch yn y DU.

Dim ond 302 o’r rheiny oedd yn salonau Affro-Caribïaidd.

Dywedodd Joan Scott, Cadeirydd Awdurdod y Diwydiant Gwallt a Harddwch - HABIA, fod y bwlch yn y farchnad yn bodoli oherwydd “mae hi wedi bod yn gymhwyster ar wahân i wneud gwallt affro-caribïaidd.

“Felly, yn y bôn nid yw'r myfyrwyr yn ei astudio, ac felly nid yw'r bobl sy'n mynd mewn i'r diwydiant wedi'u hyfforddi i ddelio gyda’r math yna o wallt."

Pan ofynnodd ITV Cymru i’r Cadeirydd pa mor hir y bydd yn ei gymryd i weld y newidiadau hyn yn cael eu gweithredu mewn salonau ledled y DU, dywedodd Joan Scott mai “dyma’r cam cyntaf”.

"Rwy’n credu y bydd e’n cymryd o leiaf 12 mis oherwydd mae’r safonau bellach ar waith, ac yn fwy cynhwysol. Nawr, mae'n rhaid i'r sefydliadau ddyfarnu adolygu eu cymwysterau,” ychwanegodd.

“Dylai fod yr holl wasanaethau sylfaenol - torri, lliwio a steilio yn cael eu cynnwys ym mhob cymhwyster.”

‘teimlad mor anhygoel’

Yn ôl Sian, mae’r cam i agor ei salon ei hun sy’n arbenigo mewn trin gwallt du ac affro wedi talu ar ei ganfed.

“Yn y pen draw, fe wnes i jyst gwneud e a fi mor falch wnes i, oherwydd ma’r nifer o clients, y merched ifanc, yr oedolion ... mae gen i gymaint o bobl sy'n dod ata’ i ac sy'n diolch i fi am wneud eu gwallt.

“Mae'n deimlad mor anhygoel i wneud i rywun deimlo mor hyderus ynddo'i hun hefyd.

“Wrth i mi fynd yn hŷn rydw i wrth fy modd gyda fy braids, ac rydw i'n teimlo mor hyderus pan ddwi'n eu gwisgo. Mae’n gwneud fi’n hapus.”

Gallwch wylio'r fideo'n llawn yma.

Lluniau: ITV Cymru.