Annog pobl i gymryd y trydydd brechlyn Covid-19 ar drothwy gaeaf ‘heriol’ i’r GIG
Mae’r Gweinidog Iechyd wedi annog y rhai sy’n gymwys am y trydydd brechlyn Covid-19 i’w gymryd cyn “cyfnod heriol i’r GIG yng Nghymru”.
Bydd y rhan fwyaf o’r rhai sy’n gymwys am y brechlyn atgyfnerthu wedi ei dderbyn erbyn 31 Rhagfyr 2021, yn ôl Eluned Morgan.
Erbyn 1 Tachwedd 2021, bydd pawb rhwng 12-15 oed wedi cael cynnig un dos o'r frechlyn, a bydd preswylwyr cartrefi gofal a staff iechyd gofal wedi cael cynnig trydydd dos.
Wrth gyhoeddi Strategaeth Frechu Covid-19 newydd y llywodraeth, cadarnhaodd y Farwnes Morgan bod cynlluniau ar waith i ddatblygu system apwyntiadau brechu ar-lein hefyd.
Daw’r cyhoeddiad wrth i’r llywodraeth ddarogan gaeaf “hynod o anodd i’r gwasanaeth iechyd”.
“Mae’n hanfodol bwysig fod pobl yn manteisio ar y cynnig i gael brechiad Covid-19 a brechiad rhag y ffliw os ydyn nhw’n gymwys, er mwyn eu hamddiffyn nhw eu hunain a’r Gwasanaeth Iechyd,” meddai’r Gweinidog Iechyd.
Bydd pobl sy'n gymwys i gael eu brechiad atgyfnerthu Covid-19 yn cael gwybod ble y bydd eu brechiad yn digwydd pan fyddant yn cael eu gwahodd.
— Llywodraeth Cymru #DiogeluCymru (@LlywodraethCym) October 12, 2021
Bydd eich bwrdd iechyd yn cysylltu â chi pan ddaw eich tro. pic.twitter.com/4KXTZHKkLF
Yn ôl ffigyrau diweddaraf Iechyd Cyhoeddus Cymru, mae 2,229,956 wedi derbyn dau ddos o frechlyn Covid-19 yng Nghymru.
Mae hyn gyfystyr ag oddeutu 85% o’r boblogaeth dros 16 oed yn ôl Llywodraeth Cymru.
Ychwanegodd Eluned Morgan: "Nid oes unrhyw bryder ynghylch cyflenwadau unrhyw un o'r brechlynnau ac rydyn ni’n gobeithio y bydd cymaint o bobl â phosibl yn manteisio ar y cynigion i barhau i amddiffyn y rheini sydd fwyaf agored i niwed yn ogystal â’r Gwasanaeth Iechyd."
Dywedodd y bydd manteision rhoi trydydd dos i oedolion iau yn cael ei ystyried pan ddaw rhagor o wybodaeth i law.