Mae tri dyn wedi cyfaddef iddyn nhw achosi terfysg wedi marwolaethau dau fachgen yn ardal Trelái, Caerdydd.

Cyfaddefodd Callum O’Sullivan, 24, Jordan Webster, 29, a Jayden Westcott, 20, o ardal Trelái, i achosi terfysg yn yr ardal yn 2023.

Roedd anhrefn ar strydoedd Trelái, ddydd Llun, 22 Mai, 2023 yn dilyn marwolaethau dau fachgen ifanc, Kyrees Sullivan, 16, a Harvey Evans, 15, mewn gwrthdrawiad.

Dangosodd delweddau CCTV fan Heddlu De Cymru yn dilyn y bechgyn ar feiciau trydan cyn iddyn nhw fod mewn gwrthdrawiad yn ddiweddarach.

Wrth i densiynau gynyddu rhwng pobl leol a’r heddlu, cafodd dwsinau o blismyn eu hanafu a chafodd ceir eu rhoi ar dân.

Roedd y tri dyn wedi gwadu'r cyhuddiadau mewn gwrandawiad blaenorol, ond plediodd pob un ohonynt un euog yn Llys y Goron Caerdydd ddydd Mawrth.

Cafodd y dynion eu rhyddhau ar fechnïaeth, ac mae disgwyl iddyn nhw gael eu dedfrydu fis Rhagfyr. 

Ymddangosodd saith person arall yn y llys, sef Jaydan Baston, 20, o Gaerau, Zayne Farrugia, 25, o Gaerau, McKenzie Danks, 22, o Gaerau, Harvey James, 19, o'r Tyllgoed, Kieron Beccano, 26, o Sain Ffagan, Lee Robinson, 37, o Gaerdydd a Luke Williams, 31, o Drelái.

Cafodd y saith eu rhyddhau ar fechnïaeth cyn eu hachos llys nhw ar 22 Medi.