Mae arweinydd y Ceidwadwyr Cymreig yn dweud ei fod yn blaenoriaethu iechyd meddwl ar ôl iddo brofi’n bositif am Covid-19.

Mewn datganiad, fe ddywedodd Andrew RT Davies ei fod wedi bod yn sâl gyda’r ffliw ers pythefnos, ond ei fod bellach wedi profi’n bositif am Covid-19.

Yn ôl Mr Davies, mae’r haint wedi cael effaith ar ei les meddyliol, a bydd yn cymryd "seibiant llwyr" o’i waith er mwyn gwella.

Cyn-arweinydd y blaid, Paul Davies, sydd yn edrych ar ôl ei gyfrifoldebau yn y cyfamser.

Statement. pic.twitter.com/fyqDUXiKFj

— Andrew RT Davies (@AndrewRTDavies) October 7, 2021

Dywedodd Mr RT Davies: “Rwy’n dechrau gwella, ond mae rhaid i mi gyfaddef ei fod [Covid-19] wedi fy effeithio’n fawr a'i fod wedi cael effaith ar fy lles meddyliol.

“Fel nifer o ddynion, rwyf wastad wedi meddwl fod gennyf darian anorchfygol, ac fel nifer sydd wedi dioddef, rwyf wedi ystyried tybed a ddylwn i wneud hyn yn gyhoeddus.

“Serch hynny, fel arweinydd, rwy’n credu y dylai rhywun osod esiampl a hoffwn fod yn agored ac yn onest – yn yr amseroedd da a drwg – gan i mi wybod bod nifer o bobl wedi dioddef ac yn mynd i ddioddef gyda’i iechyd meddwl.

“Felly, fel mae’r doctor wedi ei ddweud, byddaf yn cymryd seibiant llwyr o’m gwaith er mwyn sicrhau fy mod yn gwella yn llawn a bownsio nôl o’r heriau rwyf wedi eu profi dros y pythefnos diwethaf.

“Yn y cyfamser, hoffwn ddiolch i Paul Davies am barhau gyda’m cyfrifoldebau yn ystod fy absenoldeb ac rwy’n gofyn am barchu preifatrwydd fy nheulu.”

Mae'r Prif Weinidog Mark Drakeford wedi estyn ei gydymdeimlad.

Hoffaf ddymuno gwellhad buan i @AndrewRTDavies a diolch iddo am fod mor agored.

Mae mor bwysig ein bod ni’n cael cymorth pam rydym ei angen - rwyf yn gobeithio bydd eraill yn dilyn ei esiampl ac yn gwneud yr un peth.

Mae pob tro lle i fwy o garedigrwydd yn ein bywydau.

— Mark Drakeford (@fmwales) October 7, 2021

Dywedodd: "Mae mor bwysig ein bod ni'n cael cymorth pam rydym ei angen - rwyf yn gobeithio bydd eraill yn dilyn ei esiampl ac yn gwneud yr un peth.

"Mae pob tro lle i fwy o garedigrwydd yn ein bywydau."