Mae’r Swyddfa Dywydd wedi cyhoeddi rhybudd melyn am wyntoedd cryfion a glaw ar draws Cymru gyfan ar ddechrau'r wythnos.

Mae’r rhybudd ar gyfer glaw yn dod i rym am 18:00 ddydd Llun hyd at 18:00 ddydd Mawrth ac mae’r Swyddfa Dywydd yn rhagweld glaw trwm ar draws y rhan helaeth o dde Cymru.

Ychwanegodd y Swyddfa Dywydd y gallai 60-80mm o law gwympo ar dir uchel yn ne Cymru gyda rhwng 80-100mm yn bosib ar fryniau agored, a bod siawns am lifogydd.

Dywedodd y Swyddfa Dywydd: “Mae ansicrwydd o hyd ynglŷn â’r union fanylion, ond mae disgwyl ardaloedd o law trwm ar draws de Cymru."

Mae’r rhybudd tywydd yn berthnasol yn y siroedd canlynol:

• Abertawe
• Sir Benfro
• Blaenau Gwent
• Bro Morgannwg
• Caerdydd
• Caerffili
• Casnewydd
• Castell-nedd Port Talbot
• Ceredigion
• Sir Gaerfyrddin
• Sir Fynwy
• Merthyr Tudful
• Pen-y-bont ar Ogwr
• Powys
• Rhondda Cynon Taf
• Torfaen

Gwynt

Mae yna hefyd rybudd am wynt rhwng 22.00 ddydd Llun a 16:00 ddydd Mawrth.

Gallai'r gwyntoedd achosi hyrddiadau rhwng 40 a 50 milltir yr awr, gyda rhai mannau arfordirol a thir uchel yn debygol o wynebu gwyntoedd dros 70 milltir yr awr ar draws gogledd orllewin Cymru.

Mae’r Swyddfa Dywydd yn rhybuddio y gallai’r storm achosi difrod i adeiladau ac effeithio ar gyflenwadau pŵer.

Ychwanegodd y gallai hefyd effeithio ar drafnidiaeth.

Mae’r rhybudd yn effeithio ar y siroedd canlynol yng Nghymru:

• Abertawe
• Sir Gaerfyrddin
• Ceredigion
• Conwy
• Dinbych
• Gwynedd
• Sir Benfro
• Powys
• Ynys Môn