Mae Claudia Winkleman a Tess Daly wedi cyhoeddi eu bod nhw am gamu i lawr fel cyflwynwyr Strictly Come Dancing.

Mewn datganiad ar y cyd ar Instagram ddydd Iau, dywedodd y cyd-gyflwynwyr y byddan nhw'n gadael gyda'i gilydd ar ddiwedd y gyfres.

"Rydyn ni wedi bod wrth ein bodd yn gweithio fel deuawd ac mae cyflwyno Strictly wedi bod yn freuddwyd llwyr," meddai'r datganiad.

"Roedden ni wastad yn mynd i adael gyda'n gilydd ac mae nawr yn teimlo fel yr amser iawn.

"Bydd gennym ni'r gweddill gorau o'r gyfres anhygoel hon ac rydyn ni eisiau dweud diolch yn fawr iawn i'r BBC ac i bob person sy'n gweithio ar y sioe. Nhw yw'r tîm mwyaf disglair a byddwn ni'n eu colli nhw bob dydd."

Ychwanegodd y ddwy: "Byddwn ni'n crio pan fyddwn ni'n dweud 'daliwch ati i ddawnsio' am y tro olaf, ond byddwn ni'n parhau i'w ddweud wrth ein gilydd. 

"Jyst efallai mewn trowsus tracsiwt gartref gyda rhywfaint o bitsa."

Mae Daly, 56, wedi bod yn cyflwyno Strictly Come Dancing ers i'r gyfres gael ei lansio yn 2004 gyda'r diweddar Syr Bruce Forsyth.

Bryd hynny roedd Winkleman, 53, yn cyflwyno'r chwaer sioe, It Takes Two, yn ystod yr wythnos.

Fe aeth ymlaen i gyflwyno'r sioe ganlyniadau nos Sul gyda Daly, gan ymuno â'r brif sioe bob dydd Sadwrn o 2014 ar ôl i Syr Bruce gamu i lawr.

Cafodd y ddwy eu gwneud yn Aelodau o Urdd yr Ymerodraeth Brydeinig (MBE) yn Anrhydeddau Pen-blwydd y Brenin am eu gwasanaethau i ddarlledu.

Llun: BBC / PA