Mae person wedi marw ar ôl cael ei daro gan gar yn Rhondda Cynon Taf.

Cafodd Heddlu De Cymru eu galw i Heol-y-Sarn yn Llantrisant am 17.55 ddydd Mercher i ymateb wrthdrawiad rhwng car a cherddwr.

Er gwaethaf ymdrechion y gwasanaethau brys, bu farw'r cerddwr yn y fan a'r lle. 

Mae teulu'r person a fu farw wedi cael gwybod ac yn derbyn cefnogaeth gan swyddogion arbenigol.

Mae'r llu yn ymchwilio i'r digwyddiad ac wedi dweud eu bod yn awyddus i siarad gyda pherson mewn dillad 'high-vis' oren, a wnaeth siarad â'r person ychydig cyn y digwyddiad.

Mae swyddogion yn apelio am wybodaeth neu luniau 'dashcam' gan unrhyw un oedd yn teithio'n agos i gylchfan Ynysmaerdy ar ffordd yr A4119, ger Heol-y-Sarn, i gysylltu gyda nhw.

Mae modd rhannu gwybodaeth drwy gysylltu â Heddlu De Cymru a dyfynu'r cyfeirnod 2500338095.