Mae Pont y Borth wedi ailagor yn llawn i gerbydau am 07.00 ddydd Gwener, er bod cyfyngiad ar rai cerbydau trwm yn parhau.

Daw hyn ar ôl i'r bont gau yn annisgwyl ar ddechrau mis Hydref yn dilyn cyngor brys gan beirianwyr.

Ers hynny, mae gwaith dros dro i fynd i'r afael â phroblem gyda nifer o folltau ar y bont wedi ei gwblhau'n llwyddiannus.

O hyn ymlaen fe fydd terfyn pwysau o 7.5 tunnell ar waith ar ôl i beirnawyr gynghori ei bod hi'n ddiogel i godi'r terfyn pwysau 3 tunnell oedd mewn lle yn flaenorol.

Fe fydd y gwaith dros dro yn cael ei archwilio bob dydd Mercher am 10.00, ac fe fydd traffig yn cael ei reoli ar y bont gydag arwyddion yn ystod y gwaith yma. 

Mae'r bont yn ailagor yn cyd-fynd â Ffair y Borth, ac fe fydd yn caniatáu i draffig deithio i'r ynys ac oddi yno ar y ddwy bont yn ystod y digwyddiad. 

Dywedodd y Llywodraeth y bydd gwaith "ar ddatrysiad parhaol" i'r broblem yn digwydd yn yr wythnosau nesaf er mwyn hwyluso gwaith Cam 2.

Ychwanegodd y llywodraeth eu bod yn ymddiheuro am yr anghyfleusterau a achoswyd yn sgil y gwaith.