Mae dyn o Landysul oedd yn gyn-aelod o dîm camerau cylch cyfyng Heddlu Dyfed-Powys wedi pledio’n euog i reoli drwy orfodaeth a throseddau diogelu data ddeuddydd cyn ei achos llys yn Llys y Goron Abertawe.

Roedd Russell Hasler, 41 oed, yn gweithio i Heddlu Dyfed-Powys yn eu pencadlys o fis Mai 2019 i fis Tachwedd 2023.

Ar 18 Hydref 2023, arestiwyd Hasler gan swyddogion o Adran Safonau Proffesiynol Heddlu Dyfed-Powys ar amheuaeth o gyflawni troseddau diogelu data, ymddygiad rheolaethol a gorfodaethol a chamddefnyddio cyfrifiaduron.

Ymddiswyddodd Hasler o’i swydd fel aelod o staff yr heddlu pan oedd yn destun ymchwiliad gan yr Adran Safonau Proffesiynol. 

Cafodd Hasler ei gyhuddo'n ddiweddarach o'r dair trosedd ac fe gyfaddefodd i’r troseddau diogelu data ar 5 Mawrth 2025. 

Pledio'n euog

Mynnodd ei fod yn ddieuog o ymddygiad rheolaethol a gorfodaethol tan ddydd Llun 20 Hydref, pan blediodd yn euog ddeuddydd yn unig cyn yr achos llys. 

Gwadodd y cyhuddiad o gamddefnyddio cyfrifiaduron ac nid oes unrhyw gamau gweithredu pellach yn cael eu cymryd mewn perthynas â’r cyhuddiad hwn.

Bydd Hasler yn cael ei ddedfrydu ddydd Llun 24 Tachwedd yn Llys y Goron Abertawe. 

Dywedodd yr Uwch-arolygydd Phil Rowe, Pennaeth yr Adran Safonau Proffesiynol: “Ni fydd cam-drin domestig yn cael ei oddef yn Heddlu Dyfed-Powys – p’un a yw’r troseddwr yn aelod o’r cyhoedd neu’n sefydliad.

“Fel heddlu, rydyn ni wedi ymrwymo i weithio tuag at ddileu cam-drin domestig, ac mae hynny’n flaenoriaeth o fewn ein cymunedau, ac yn fewnol yma yn Heddlu Dyfed-Powys. Rydym yn croesawu’r ple euog hwn ac yn disgwyl y ddedfryd.”