Mae'r Ysgrifennydd Cartref wedi dweud na fydd yr ymchwiliad i gangiau sydd yn meithrin perthynas amhriodol a phlant yn cael ei "wanhau".

Daw sylwadau Shabana Mahmood ar ôl i dair sydd wedi goroesi'r camdrin ymddiswyddo o'r panel goruchwylio'r wythnos yma.

Fe wnaethon nhw ymddiswyddo am eu bod yn pryderu y gallai'r ymchwiliad fod yn ehangach na dim ond y gangiau. Maen nhw hefyd yn poeni ynglŷn â phwy fydd yn cadeirio'r panel.

Does yna ddim cadeirydd wedi ei benodi eto.

Ond mae Ms Mahmood wedi dweud wrth The Times y bydd y penodiad yn digwydd cyn bo hir a bod hi'n bwysig bod y llywodraeth yn cael y person cywir.

Ym mis Mehefin fe gyhoeddodd y Prif Weinidog, Keir Starmer, y byddai yna ymchwiliad cenedlaethol yn digwydd i gangiau sydd yn meithrin perthynas amhriodol a phlant yng Nghymru a Lloegr. 

Mae panel o bobl sydd wedi goroesi camdriniaeth wedi ei sefydlu i oruchwylio'r broses.

Yn ei llythyr ymddiswyddo fe ddywedodd 'Elizabeth', nid ei henw iawn, bod y broses yn teimlo fel bod yna "gelu'r gwir" yn digwydd a bod "yr awyrgylch yn wenwynig ar gyfer goroeswyr".

Mae goroeswr arall, Ellie Reynolds, wedi awgrymu y byddai yna wrthdaro buddiannau os bydd unigolion sydd yn rhan o'r sefydliad yn cael eu dewis fel y cadeirydd.

Ymhlith y rhai sydd wedi cyrraedd y rhestr fer ar gyfer y rôl mae Annie Hudson, cyn weithiwr cymdeithasol a Jim Gamble, sydd yn gyn ddirprwy brif gwnstabl. 

Dywedodd Ms Reynolds wrth BBC Women's Hour: "Fe ddylai fod wedi bod yn farnwr. Fe ddylai fod wedi bod yn rhywun sydd yn hollol ddiduedd a heb fod a rhagfarn."

Mae Ms Mahmood wedi dweud wrth The Times y bydd y "drws wastad ar agor" os yw'r goroeswyr eisiau ail ymuno gyda'r panel.

"Ond hyd yn oed os nad ydyn nhw yn gwneud, mae'n ddyledus i fi ac i'r wlad i ateb rhai o'r pryderon maen nhw wedi codi."  

Dywedodd y bydd yr ymchwiliad yn edrych ar "ethnigrwydd a chrefydd y troseddwyr". 

Ychwanegodd ei bod yn deall y rhwystredigaeth nad yw'r ymchwiliad wedi dechrau eto a'i bod yn teimlo'r rhwystredigaeth hynny ei hun. 

Llun: Tŷ'r Cyffredin/ PA