Mae’r heddlu'n dweud eu bod nhw wedi arestio bachgen yn ei arddegau ac wedi gweithredu i ddiogelu disgyblion yn Ysgol Dyffryn Aman ddydd Gwener.

Fe gafodd bachgen 14 oed ei arestio ar amheuaeth o fygwth lladd yn dilyn adroddiadau am negeseuon a anfonwyd dros y cyfryngau cymdeithasol.

Dywedodd Heddlu Dyfed Powys eu bod nhw wedi derbyn adroddiad am negeseuon bygythiol yn cael eu hanfon ddydd Gwener, Hydref 17.

Fe arweiniodd hynny at gymryd camau i ddiogelu disgyblion yn Ysgol Dyffryn Aman, yn Rhydaman.

Fe gafodd y bachgen 14 oed ei arestio nos Wener, ac mae ymholiadau'n parhau.

Dywedodd y Prif Arolygydd Mike Llewellyn: “Hoffwn sicrhau rhieni, a'r gymuned ehangach, y cymerwyd camau cyflym i ddiogelu disgyblion ac i ddod o hyd i’r unigolyn sydd dan amheuaeth cyn gynted ag y derbyniwyd yr adroddiad hwn.

“Efallai y byddwch yn sylwi ar bresenoldeb heddlu uwch na'r arfer yn yr ardal dros y dyddiau nesaf.

“Bydd y rhain yno er mwyn rhoi mwy o sicrwydd i'r rhai sy'n byw ac yn mynychu'r ysgol yn yr ardal.”

Dywedodd Cyngor Sir Gaerfyrddin bod yr ysgol wedi ei gloi ei lawr er budd diogelwch disgyblion a staff am gyfnod byr brynhawn ddydd Gwener, a bod y gwersi wedi parhau.

Ym mis Ebrill, fe gafodd merch 14 oed ei dedfrydu i 15 mlynedd dan glo am geisio llofruddio ar ôl i ddau athro a disgybl gael eu trywanu yn yr un ysgol.