Bydd Y Bala yn wynebu taith i Sir Benfro ddydd Gwener i herio Hwlffordd yn y Cymru Premier JD.

Dyma gipolwg ar unig gêm y Cymru Premier JD nos Wener. 

Hwlffordd (11eg) v Y Bala (6ed) | Nos Wener – 19:45

Ar ôl colli chwech o’u saith gêm gynghrair ddiwethaf mae Hwlffordd wedi syrthio i safleoedd y cwymp.

Mae’r Bala ar rediad hesb hefyd gan i dîm Steve Fisher golli eu tair gêm ddiwethaf gan sgorio dim ond unwaith (cic o’r smotyn).

Methodd Y Bala ag ennill dim un o’u pedair gornest yn erbyn Hwlffordd y tymor diwethaf gyda’r Adar Gleision yn ennill ddwywaith a’r ddwy gêm arall yn gorffen yn ddi-sgôr.

A byddai ddim yn syndod pe bae’r gêm hon yn gorffen yn ddi-sgôr hefyd gan mae dim ond Llanelli (7) sydd wedi sgorio llai o goliau cynghrair na Hwlffordd (11) a’r Bala (10) y tymor hwn.

Record cynghrair diweddar: 

Hwlffordd: ❌❌❌✅❌

Y Bala: ➖✅❌❌❌