Mae Cyngor Sir Conwy wedi penodi'r ddynes gyntaf i fod yn arweinydd ar yr awdurdod.

Y Cynghorydd Julie Fallon o Ddeganwy yw'r arweinydd newydd, yn dilyn ei phenodiad mewn cyfarfod arbennig ym mhencadlys y cyngor yng Nghonwy fore dydd Mercher.

Etholwyd y Cynghorydd Fallon o Grŵp Annibynnol Conwy'n Gyntaf ar ôl derbyn 40 pleidlais, gyda saith pleidlais yn mynd i'r Cynghorydd Paul Lucock o Abergele.

Mae’r bleidlais yn dilyn penderfyniad y cyn-arweinydd, y Cynghorydd Charlie McCoubrey, i gamu i lawr.

Dywedodd y Cynghorydd Fallon, sydd gyda phortffolio addysg yn y cabinet, wrth y siambr na fyddai’n eu siomi.

“Roeddwn i’n golygu pob gair a ddywedais o ran fy mod i eisiau bod yn hawdd mynd ato. Mae croeso i unrhyw un ohonoch ddod i guro ar fy nrws ar unrhyw adeg.

“Mae gennym ni 18 mis. Nid yw'n amser hir, felly gadewch i ni weithio gyda'n gilydd a gwneud hwn y 18 mis gorau posibl. Gadewch i ni fwrw ymlaen gyda'r gwaith.”

Ychwanegodd y Cynghorydd Fallon: “Mae bod yr arweinydd benywaidd cyntaf yn anrhydedd go iawn.”

Wrth gamu i lawr, diolchodd y Cynghorydd Charlie McCoubrey i'r cynghorwyr eraill am eu cefnogaeth yn ystod ei gyfnod fel arweinydd dros y pedair blynedd a hanner diwethaf.

Yn ystod ei araith, trafododd y Cynghorydd McCoubrey ei anawsterau personol, gan gynnwys colled bersonol, anaf, a'r awydd i dreulio mwy o amser gyda'i deulu.

"Rwy'n gwybod fy mod wedi rhoi fy ngorau glas," meddai.

"Mae wedi bod yn anrhydedd ac yn bleser cymryd y rôl honno. Mae wedi bod yn foddhaol mewn rhai agweddau, yn bleserus iawn, ond mewn agweddau eraill dros y tair blynedd diwethaf, mae wedi bod yn arbennig o flinderus, a dyna fu'r rhan fwyaf heriol o'r swydd i mi."

Llun: Facebook