Mae’r seren Hollywood Leonardo DiCaprio wedi rhoi teyrnged i’w “gyfaill annwyl” a’i “arwr” Jane Goodall ar ôl ei marwolaeth yn 91 oed.

Bu farw'r cadwraethwr, a oedd yn arbenigwr ar ymddygiad tsimpansïaid, o achosion naturiol yng Nghaliffornia, meddai Sefydliad Jane Goodall mewn datganiad ddydd Mercher.

Rhannodd seren y Titanic, sy’n 50 oed, luniau ar Instagram o’i hun a’r Fonesig Jane, a oedd yn ferch i'r nofelydd Margaret Myfanwe Joseph o Aberdaugleddau.

Fe gafodd hi ei hurddo Negesydd Heddwch y Cenhedloedd Unedig yn 2002, 12 mlynedd cyn i DiCaprio gael yr un teitl hefyd.

“Heddiw rydym wedi colli arwr gwirioneddol i’r blaned, ysbrydoliaeth i filiynau, a ffrind annwyl,” meddai DiCaprio.

“Neilltuodd Jane Goodall ei bywyd i ddiogelu ein planed a rhoi llais i’r anifeiliaid gwyllt a’r ecosystemau y maent yn byw ynddynt.

“Trawsnewidiodd ei hymchwil arloesol ar tsimpansïaid yn Tanzania ein dealltwriaeth o sut mae ein perthnasau agosaf yn byw, yn cymdeithasu ac yn meddwl.

“Fe wnaeth hi ein hatgoffa am ein cysylltiadau dwfn nid yn unig â tsimpansîod a’r epaod mawr eraill, ond â bywyd yn gyffredinol.

“Am ddegawdau, teithiodd Jane y byd gydag egni diflino, gan ddeffro cenedlaethau i ryfeddod y byd naturiol.

“Siaradodd yn uniongyrchol â’r genhedlaeth nesaf, gan feithrin gobaith, cyfrifoldeb a’r gred y gall pob unigolyn wneud gwahaniaeth. 

“Ysbrydolodd filiynau i ofalu, i weithredu, ac i obeithio. Ni stopiodd byth.”

Mae cyn-arlywyddion yr Unol Daleithiau Joe Biden, Bill Clinton a Barack Obama ymysg y rheini sydd wedi rhoi teyrngedau i Jane Goodall.

Dywedodd Mr Biden ei fod wedi'i "dristáu'n fawr" gan y newyddion am farwolaeth Dame Jane, tra bod Mr Obama wedi canmol ei "gallu rhyfeddol" i "gysylltu â rhyfeddodau naturiol ein byd".

Llun gan Leonardo DiCaprio ar Instagram.