Mae’r dramodydd Leo Drayton, 24, o Gaerdydd, yn defnyddio’r theatr i ymateb i ‘rwystrau’ mae pobl traws yn eu hwynebu.

Dros y flwyddyn ddiwethaf, mae Leo wedi ysgrifennu sioe newydd, Dynolwaith, sy’n cael ei pherfformio ganddo hefyd.

Fe wnaeth profiadau personol Leo, fel Cymro trawsrywiol, ysbrydoli’r stori, ac mae’n dadlau bod y sioe yn blatfform pwysig:

“Ar adeg pan mae'r gymuned draws yn cael ei thargedu a’i cham-gyfleu, mae'n bwysicach nag erioed bod ein lleisiau'n cael eu clywed.”

Wrth lansio’r sioe, meddai Leo: “Mae'n fraint cael dweud y stori hon, yn enwedig yn y Gymraeg. 

“Mae’n gynrychiolaeth pwysig, a chynrychiolaeth pwerus. Mae’r sioe yn dangos elfennau o’r profiad traws ‘dyn ni ddim yn clywed amdano.

“Alla’i ddim dychmygu tîm gwell yn helpu fi i ddweud y stori hon.”

Mae’r sioe yn cael ei chyd-gynhyrchu gan gwmni Frân Wen, gyda Gethin Evans yn cyfarwyddo’r sioe.

“Mae gan y gymuned draws gyfoeth o straeon i’w rhannu, gyda phob un yn mapio siwrnai unigryw a thrawsnewidiol," meddai Gethin Evans.

“Ar ôl gweithio’n agos gyda Leo dros y ddwy flynedd diwethaf, rydym yn gyffrous i rannu geiriau Leo a chreu gofod i eraill rannu eu geiriau nhw eu hunain,” meddai Gethin.

Bydd Dynolwaith yn cael ei berfformio yn Theatr y Sherman tan 4 Hydref, cyn mynd ar daith genedlaethol.