Mae dyn 34 oed wedi cael ei ddedfrydu i oes yn y carchar am lofruddio menyw 47 oed.

Cafodd Matthew Batttenbough, sydd heb gartref sefydlog, ei ddedfrydu yn Llys y Goron Abertawe ddydd Gwener.

Plediodd yn euog i lofruddio Leanne Williams ar 18 Awst.

Fe gafodd ei chorff ei ddarganfod yn ei chartref at Ffordd Gomer yn Townhill yn y ddinas ar 27 Chwefror.

Fe wnaeth arolwg post-mortem ganfod bod hi wedi dioddef sawl anaf oedd yn gyson ag ymosodiad.

Bydd Battenbough yn treulio o leiaf 20 mlynedd ac 114 diwrnod dan glo.

Image

Mewn datganiad dywedodd teulu Leanne: “Roedd Leanne yn brydferth, yn gryf, ac yn garedig.

"Roedd hi wrth ei bodd â natur ac anifeiliaid ac roedd ganddi gysylltiad arbennig â cheffylau.

“Roedd hi’n dyheu am helpu eraill trwy roi’r cyfle iddyn nhw gael mynediad at geffylau a merlod wedi’u hyfforddi’n arbennig a oedd yn sensitif i iechyd meddwl a phroblemau eraill.

“Bydd colled fawr ar ei hôl.

“Hoffem ddiolch i Heddlu De Cymru am eu cefnogaeth barhaus a diwydrwydd dyladwy’r tîm ymchwilio.”

Dywedodd y Ditectif Arolygydd David Butt ei fod yn gobeithio bydd dedfryd Battenbough yn "ryw fath o gysur" i deulu Leanne.

“Roedd y newyddion am farwolaeth Leanne yn dorcalonnus i’w theulu ac i gymunedau ehangach Townhill ac Abertawe," meddai.

“Roedd gweithredoedd Matthew Battenbough wedi dod a bywyd Leanne i ben. 

"Cafodd bywydau eu rhywgo'n ddarnau ac fe achosodd ofid aruthrol i’w deulu ei hun hefyd.

“Gobeithiwn fod y ddedfryd hon yn cynnig rhywfaint o gysur i deulu a ffrindiau Leanne.

“Hoffwn ddiolch i gymuned Townhill am y ffordd yr oeddynt wedi cynorthwyo a chefnogi’r ymchwiliad yn ystod cyfnod trist ac anodd iawn.”