Ddeuddydd yn unig cyn i'r gorsafoedd pleidleisio agor yn etholaeth Caerffili, mae'n ddyddiau olaf yr ymgyrchu, wedi i ddadl deledu danllyd gael ei chynnal rhwng yr ymgeiswyr yr wythnos ddiwethaf.  

Mae'r is-etholiad yn cael ei gynnal yn dilyn marwolaeth Hefin David AS.

Dyma’r ymgeiswyr sy’n sefyll yn is-etholiad Caerffili ar 23 Hydref 2025. 

Image

Y Blaid Werdd – Gareth Hughes

“Rwy’n credu bod angen newid gwleidyddol cadarnhaol ar Gymru – newid sy’n rhoi pobl a’r blaned yn gyntaf,” meddai.

“Y Blaid Werdd yw’r unig blaid asgell-chwith sy’n cyd-fynd â’m gwerthoedd, ac rwy’n benderfynol o roi llais cryf, gonest ac ymroddedig i Gaerffili yn y Senedd.”

Image

Y Ceidwadwyr Cymreig – Gareth Potter

“Mae’n anrhydedd fawr i mi gael fy newis gan ein haelodau i sefyll ar ran y Ceidwadwyr Cymreig yng Nghaerffili yn isetholiad y Senedd,” meddai.

“Ar ôl 26 mlynedd, mae Llafur Cymru wedi ein gadael ni i lawr dro ar ôl tro. 

“O rieni sy’n poeni am ddiogelwch ysgolion i bensiynwyr sy’n cael trafferth archebu apwyntiadau gyda meddyg teulu neu berchnogion busnesau bach sy’n cael wynebu baich trethi annheg, mae hyn i gyd wedi’i greu gan Lafur ar ddau ben yr M4.

“Byddaf yn curo drysau, ac yn rhannu fy nghynllun ar gyfer Caerffili, ond yn bwysicaf oll, fe fyddaf yn gwrando arnoch chi.”

Image

Y Democratiaid Rhyddfrydol – Steve Aicheler

“Mae’r Democratiaid Rhyddfrydol yn gwybod bod Caerffili yn haeddu gwell na’r dull o reoli dirywiad sy'n cael ei ddefnyddio gan Lafur a’r Ceidwadwyr," meddai.

"Dim ond drwy ganolbwyntio ar yr hyn sy’n wirioneddol bwysig y byddwn ni’n gwneud pethau’n well i Gaerffili.

“Rhaid blaenoriaethu gofal cymdeithasol i ryddhau’r gwasanaeth iechyd, gan flaenoriaethu gofal plant ac addysg fel y gall ein pobl ifanc ffynnu."

Image

Gwlad – Anthony Cook

“Ar ôl byw yng Nghwm Rhymni am y rhan fwyaf o fy mywyd, ar wahân i’m hamser yn gwasanaethu gyda chatrawd y Cymry Brenhinol, rwy’n gwybod o brofiad yr heriau y mae ein cymunedau’n eu hwynebu yn y cymoedd hyn,” meddai.

“Mae fy nheulu wedi bod yn rhan o hanes mwyngloddio Cwm Rhymni ers cenedlaethau, ac rwy’n deall yr anawsterau sydd wedi dod yn sgil dirywiad ein diwydiannau traddodiadol.”

Image

Llafur Cymru – Richard Tunnicliffe

“Yn Hefin, rydym wedi colli rhywun a oedd yn aelod gwerthfawr ac uchel ei barch o’n cymuned, hyd yn oed cyn iddo gael ei ethol fel ein AS,” meddai.

“Roedd e’n ddyn a oedd bob amser yn chwilio am y gorau ym mhobl eraill ac am yr hyn yr oedden nhw'n gallu ei gyflawni, nid yr hyn na allen nhw ei wneud; ac roedd e’n annog, yn cefnogi ac yn grymuso pobl.

“Roedd ganddo ffydd ynof, nad oedd gen i i ddechrau. Gyda chalon drom rwyf eisiau ei ad-dalu.” 

Image

Plaid Cymru – Lindsay Whittle

“Mae amgylchiadau'r is-etholiad hwn, a gododd yn sgil marwolaeth Hefin David, wrth gwrs yn drist iawn ac rwy’n parhau i feddwl yn fawr am deulu ac anwyliaid Hefin,” meddai Lindsay Whittle.

“Mae pobl Caerffili yn haeddu cynrychiolydd lleol angerddol yn y Senedd. Rwy'n benderfynol o gynnig agenda gadarnhaol, i sicrhau fod yr ardal hon yn cael bargen deg.”

Image

Reform UK – Llŷr Powell

“Nid yw hwn yn isetholiad yr oedd yr un ohonom ei eisiau,” meddai.

“Roedd Hefin yn aelod rhagorol o'r Senedd nad oedd erioed yn llwythol, ac roedd yn ymroddedig i'w gymuned ac yn gwneud gwahaniaeth gwirioneddol ym myd addysg.

“Mae cymunedau lleol Caerffili yn haeddu Aelod Senedd a fydd yn sefyll drostyn nhw ar ôl dros 26 mlynedd Lafur a Phlaid Cymru. Dim ond Reform UK sy'n cynnig cyfle am newid gwirioneddol.”

Image

UKIP - Roger Quilliam

“UKIP yw'r unig blaid a fyddai'n cael gwared â'r Senedd. Mae hyd at 1 o bob 3 yng Nghymru eisiau cael gwared â'r Senedd. Mae pobl Caerffili yn haeddu llais unoliaethol," meddai.