Mae cwest wedi clywed bod dyn a syrthiodd i'w farwolaeth yn un o gyngherddau'r band Oasis yn Wembley wedi dioddef "nifer o anafiadau corfforol".

Bu farw Lee Claydon, 45 oed, o Bournemouth, Dorset, yn dilyn y digwyddiad yn y stadiwm yn Llundain ar 2 Awst.

Agorwyd cwest Mr Claydon yn Llys Crwner Barnet ddydd Iau gan yr uwch grwner Andrew Walker.

Clywodd y cwest fod Mr Claydon wedi cael ei gludo i ganolfan feddygol yn Wembley ar ôl y gwymp, lle cyhoeddwyd ei fod wedi marw am 22.38.

Dywedodd Mr Walker fod archwiliad post-mortem ar 6 Awst wedi nodi'r achos meddygol dros ei farwolaeth fel "nifer o anafiadau corfforol".

Gohiriodd Mr Walker y cwest tan y bydd gwrandawiad cyn-cwest yn cael ei gynnal ar 19 Tachwedd.

Ychwanegodd yr uwch grwner: “Ar ôl clywed y wybodaeth honno, rwyf am agor ymchwiliad i farwolaeth Lee Claydon.

“Rwyf am orchymyn bod gwrandawiad cyn-cwest yn cael ei gynnal ar Dachwedd 19 eleni am 10.00.”

Digwyddodd y farwolaeth yn ystod cyfres o sioeau stadiwm ar daith aduniad Live ’25 y band eleni – eu taith gyntaf ers i'r band chwalu yn 2009.

Dywedodd Oasis yn flaenorol mewn datganiad: “Rydym wedi ein syfrdanu ac wedi ein tristáu o glywed am farwolaeth drasig ffan yn y sioe.

“Hoffai Oasis estyn ein cydymdeimlad diffuant i deulu a ffrindiau’r person dan sylw.”