Mae cyfyngiadau teithio a phedwar rhybudd o lifogydd posib mewn grym yng Nghymru yn sgil tywydd garw ar hyn o bryd.

Mae'r rhybudd melyn gan y Swyddfa Dywydd am wyntoedd cryfion yn ei le ar gyfer Cymru gyfan, ac mae cyfyngiadau teithio mewn rhai llefydd. 

Fe ddechreuodd y rhybudd am 20:00 nos Sul, ac fe fydd yn parhau mewn lle hyd nes 18:00 ddydd Llun.

Mae'r rhybuddion llifogydd gan Cyfoeth Naturiol Cymru yn bodoli yn Nalgylch Conwy, Dalgylch Dyfi, Ewenni a Gorllewin Bro Morgannwg a Nant-y-fendrod a Nant Brân. Maent i gyd yn rhybuddio 'Byddwch yn barod'. 

Roedd rhybudd am wyntoedd cryfion ar Pont Britannia ben bore gyda'r cyflymder wedi ei ostwng i 30mya.

Mae coed wedi cwympo ar yr A470 yn Aberangell yng Ngwynedd ac A487 yn Nhaliesin yng Ngheredigion, meddai Traffig Cymru.

Roedd rhai adroddiadau am doriadau trydan gwasgaredig ar draws y gogledd a'r de.

Dywedodd Sw Mynydd Bae Colwyn eu bod nhw'n bwriadu cau ddydd Llun oherwydd y tywydd garw.

Gwasgedd aer isel sydd fwyaf gyfrifol am y gwyntoedd cryfion, sydd hefyd wedi golygu cyfyngiadau teithio rhwng Ynys Môn a'r tir mawr.

Fe allai'r gwyntoedd fod rhwng 50 a 60 milltir yr awr ar yr arfordir ac ar dir uchel gyda hyrddiadau rhwng 70 ac 80 milltir yr awr yn bosib mewn mannau agored.

Yn ôl y Swyddfa Dywydd mae'n bosib y bydd oedi i drenau, bysiau, ffyrdd, llongau ac awyrennau. 

Fe allai rhai ardaloedd golli trydan hefyd am gyfnod.