Mae’r prif hyfforddwr Sean Lynn wedi gwneud saith newid i dîm Cymru fydd yn wynebu Canada ddydd Sadwrn yn eu hail gêm yng Nghwpan y Byd Menywod.

Fe gollodd Cymru 8-38 yn erbyn yr Alban yn eu gêm agoriadol ddydd Sadwrn diwethaf.

Oherwydd bod Cymru wedi colli yna mae’n rhaid iddyn nhw guro Canada os am unrhyw obaith i fynd trwyddo i'r rowndiau nesaf.

Gan ystyried bod Canada yn ail ar restr detholion y byd, fe fydd gan Gymru dalcen called i’w curo yn Salford.

Fe fydd y blaenasgellwr Bethan Lewis, fydd yn ennill ei 60ain cap, yn arwain y tîm am y tro cyntaf gan fod y cyd-gapteniaid Alex Callender a Kate Williams wedi’u hanafu.

Mae disgwyl i’r ddwy fod ar gael ar gyfer gêm olaf y grŵp yn erbyn Ffiji yng Nghaerwysg ar 6 Medi.

Gall yr eilydd Gwenllian Pyrs ennill ei 50fed cap o’r fainc.

Fe fydd y prop Maisie Davies a’r bachwr Molly Reardon yn ymuno â Sisilia Tuipulotu yn y rheng flaen.

Keira Bevan a Lleucu George fydd yr haneri unwaith eto.

Courtney Keight a Carys Cox fydd y canolwyr gyda Jasmine Joyce-Butchers, Lisa Neumann ar yr esgyll gyda Nel Metcalfe yn parhau fel cefnwr.

Mae disgwyl i Branwen Metcalfe, 18,ennill ei chap cyntaf o’r fainc yn y rheng ôl.Mae hi’n ymuno â’i chwaer Nel yn y garfan ar gyfer y gêm.

Fe ddechreuodd y chwiorydd a Gwenllian Pyrs eu gyrfaoedd gyda Chlwb Rygbi Nant Conwy.

'Her fawr'

Dywedodd Sean Lynn: “Rydym wedi edrych yn ofalus ar ein hunain ac wedi cael sgyrsiau gonest am y perfformiad sydd ei angen arnom yn erbyn un o’r timau gorau yn y byd.

“Canada yw tîm rhif dau yn y byd ac un o’r ffefrynnau i ennill Cwpan y Byd ac rydym yn gwybod y byddant yn her fawr.

“Mae angen i ni ddod ag egni a balchder go iawn yn y crys ac mae’r ffocws drwy’r wythnos wedi bod arnom ni a’r hyn sydd angen i ni ei wneud i gynhyrchu perfformiad ddydd Sadwrn.

“Mae newidiadau wedi bod ac maent wedi’u gwneud oherwydd bod chwaraewyr wedi ennill y cyfle wrth ymarfer i chwarae mewn Cwpan y Byd.

“Dywedwyd wrth bob un o’r 23 chwaraewr a ddewiswyd i fod yn ddewr ac i beidio â difaru pan fyddant yn cerdded oddi ar y cae ddydd Sadwrn.

“Nid oes gennym unrhyw gamargraff o’r her sydd o’n blaenau, ond mae hyn i gyd yn ymwneud â ni a dangos beth mae’n ei olygu i chwarae dros Gymru yng Nghwpan Rygbi’r Byd.”

Dyma’r garfan:

15 Nel Metcalfe (Gloucester/Hartpury)

14 Jasmine Joyce-Butchers (Bristol Bears)

13 Carys Cox (Ealing Trailfinders)

12 Courtney Keight (Sale Sharks)

11 Lisa Neumann (Harlequins)

10 Lleucu George (Gloucester/Hartpury)

9 Keira Bevan (Bristol Bears)

1 Maisie Davies (Bristol Bears)

2 Molly Reardon (Gwalia Lightning)

3 Sisilia Tuipulotu (Gloucester/Hartpury)

4 Abbie Fleming (Harlequins)

5 Gwen Crabb (Gloucester/Hartpury)

6 Bryonie King (Gwalia Lightning)

7 Bethan Lewis (capten, Gloucester/Hartpury)

8 Georgia Evans (Saracens) 

Eilyddion:

16 Kelsey Jones (Gloucester/Hartpury)

17 Gwenllian Pyrs (Sale Sharks),

18 Jenni Scoble (Gwalia Lightning)

19 Tilly Vucaj (Gwalia Lightning)

20 Branwen Metcalfe (Hartpury College)

21 Seren Lockwood (Gloucester/Hartpury)

22 Kayleigh Powell (Harlequins)

23 Kerin Lake (Gwalia Lightning) 

Cymru v Canada, 30 Awst am 12:00

Llun: Asiantaeth Huw Evans