Mae Donald Trump wedi dweud nad yw e a Vladimir Putin wedi llwyddo i ddod i gytundeb er mwyn dod â’r ymladd yn Wcráin i ben. 

Ar ôl trafodaethau a barodd bron i dair awr yn Anchorage, Alaska nos Wener, dywedodd Donald Trump y bydd y trafodaethau'n parhau eto. 

Chafodd Arlywydd Wcráin, Volodomyr Zelensky ddim gwahoddiad i'r cyfarfod. 

Ond yn dilyn trafodaethau dros y ffôn fore Sadwrn, fe fydd Mr Zelensky bellach yn cyfarfod â Donald Trump yn Washington DC ddydd Llun. 

'Dim cytundeb'

Mewn cynhadledd newyddion wedi'r cyfarfod gyda Vladimir Putin nos Wener, dywedodd Donald Trump “wnaethon ni ddim cyrraedd [cytundeb].” 

Darllenodd y ddau arlywydd ddatganiadau, a doedd dim modd i ohebwyr ofyn cwestiynau iddyn nhw. 

Dywedodd Donald Trump bod “ychydig o gynnydd gwych” wedi bod, gyda'r ddau wedi cytuno ar “nifer o bwyntiau” ac “ychydig iawn” bellach ar ôl i’w drafod. 

Dywedodd Vladimir Putin bod ganddo “ddiddordeb gwirioneddol” i ddod â rhyfel Rwsia yn Wcráin i ben. 

Awgrmymodd hefyd y dylai'r cyfarfod nesaf gyda Mr Trump ddigwydd ym Moscow. 

Ni wnaeth Arlywydd America ymrwymo i hynny, ond dywedodd " y gallai o bosibl weld hynny'n digwydd."

'Galwad hir'

Mae Swyddfa Arlywyddol Wcráin wedi cadarnhau bod yr Arlywydd Zelensky wedi siarad â Donald Trump dros y ffôn fore Sadwrn.

Dywedodd llefarydd: "Roedd yn alwad hir - i ddechrau rhwng yr Arlywyddion Zelensky a Trump yn unig, ac ar ôl hynny fe wnaeth arweinwyr gwledydd Ewrop ymuno â'r sgwrs."

Mae Mr Zelenksy wedi dweud ei fod yn “ddiolchgar am y gwahoddiad” i drafod gyda Donald Trump. 

Cadarnhaoddd Downing Street bod Prif Weinidog y DU, Syr Keir Starmer wedi bod yn rhan o’r trafodaethau dros y ffôn fore Sadwrn. 

Roedd arweinwyr Yr Eidal, Ffrainc, Yr Almaen, Gwlad Pwyl, Y Ffindir yn rhan o’r sgwrs hefyd, yn ogystal â Mark Rutte, Ysgrifennydd Cyffredinol Nato, ac Ursula von der Leyen, Llywydd  y  Comisiwn Ewropeaidd. 

Llun: Reuters