Cyhuddo dau arall o geisio llofruddio ym Merthyr
Mae dau ddyn arall wedi eu cyhuddo o geisio llofruddio yn rhan o ymchwiliad i ddigwyddiad ym Merthyr Tudful yn ystod oriau mân fore Sul diwethaf.
Cafodd Heddlu De Cymru eu galw i ardal y Gurnos tua 01.05 ar 10 Awst, wedi adroddiadau bod dyn wedi ei anafu.
Ymddangosodd Garyn Palmer, 19 oed a Jack Mew, 18 oed, y ddau o Willow Road, Merthyr yn Llys Ynadon y dref fore Sadwrn.
Maen nhw wedi cael eu cadw yn y ddalfa.
Mae disgwyl i'r ddau ymddangos yn Llys y Goron Merthyr Tudful ar 10 Medi, ynghyd â Rhys Mew, 25 oed, o Willow Road yn y dref. Roedd e eisoes wedi ei gyhuddo o geisio llofruddio.
Mae dyn 26 oed a dynes 42 oed a gafodd eu harestio yn rhan o'r ymchwiliad bellach wedi eu rhyddhau ar fechnïaeth.
