Mae dyn wedi marw ac un arall wedi'i anafu'n ddifrifol ar ôl gwrthdrawiad ym mhentref Bwlchgwyn ger Wrecsam nos Wener. 

Digwyddodd ar ffordd y B5430 rhwng yr A525 a Rhydtalog toc ar ôl 7.30pm, ac yn ôl Heddlu Gogledd Cymru, roedd grŵp o bedwar o feiciau modur a cherbyd Range Rover yn y gwrthdrawiad.

Er gwaethaf ymdrechion y gwasanaethau brys, bu farw un o'r gyrwyr beic modur yn y fan a'r lle. 

Cafodd dyn arall anafiadau difrifol, ac mae e wedi ei gludo i Ysbyty Maelor Wrecsam.     

Dywedodd y Rhingyll Alun Jones:"Rwy'n anfon fy nhydymdeimlad dwysaf at y teulu ar yr adeg anodd hon 

"Rydym yn annog unrhyw un a welodd y gwrthdrawiad neu a oedd yn teithio neu gerdded yn yr ardal, i gysylltu â ni yn ogystal â bobl allai fod â deunydd fideo dash cam."

Cafodd y ffordd ei chau am gryn amser. 

Mae modd cysylltu â Heddlu'r Gogledd gydag unrhyw wybodaeth gan ddyfynnu'r rhif C126741.