Image
Mam a merch o Ben Llŷn yn cynnig sesiynau therapi ceffylau
Mam a merch o Ben Llŷn yn cynnig sesiynau therapi ceffylau
Mae mam a merch o Ben Llŷn wedi dechrau cynnig sesiynau therapi ceffylau sy'n ystyriol i drawma yn yr ardal.
Bwriad Gwenno a Louise Williams ydy cefnogi lles meddyliol oedolion a phlant sydd wedi profi trawma yn ystod eu bywydau.
Yn wahanol i therapi siarad, mae perchnogion Llesiant Llŷn yn dweud eu bod yn cefnogi unigolion drwy’r pŵer iachaol sydd gan geffylau.
"Dw i'n meddwl bod o'n bwysig iawn cael rhywbeth fel hyn ar stepan drws pobl Pen Llŷn," meddai Gwenno, 26 oed, sy'n weithiwr cymdeithasol.
"Mae fi a mam wedi dewis neud y prosiect yma i helpu cymuned ni achos 'da ni'n teimlo bod 'na angen mawr.
"Dw i'n bersonol yn gweithio efo plant, ac mae mam efo cefndir o gefnogi pobl allan yn y gymuned hefyd.
"'Da ni'n gweld bod lot o bobl angen cefnogaeth therapiwtig yn eu bywydau nhw."
'Dysgu gan y ceffyl'
Bydd y gwasanaeth yn cael ei arwain gan Louise, sydd wedi cymhwyso fel therapydd ceffylau sy’n ystyriol o drawma.
"Dydi gymaint o bobl ddim yn deall be' ydi emosiynau, felly 'da ni'n dechrau efo hynny," meddai Louise, 54 oed, sydd yn gweithio i fenter gymdeithasol Cyfle.
"Wedyn efo'r programme 'da ni'n mynd i mewn efo 'chydig o reflective grooming, ac wedyn 'da ni'n symud i fewn i grounding a boundaries.
"Y rhan fwyaf ohono fo ydy dysgu sut mae'r ceffyl yn bihafio a be' mae'n ei olygu – be' mae o'n neud efo'i glustiau neu efo'i goes, neu'r ffordd mae o'n teimlo, os ydy o'n sefyll i ffwrdd, dod yn agos – ac wedyn be' yda ni'n neud ydi reflectio ar ni'n hunain mewn ffordd."
Cafodd y rhaglen ei chynllunio gyda chefnogaeth y sefydliad nid-er-elw The Way of the Horse yn Sir Lincoln.
Bydd sesiynau therapi Llesiant Llŷn ar gael yn y Gymraeg a'r Saesneg, meddai Louise.
Yn ôl Samantha o Gricieth, mae'r sesiynau therapi wedi helpu ei merch, Dana, sy'n dioddef o orbryder.
"Dw i wedi gweld gwahaniaeth enfawr yn Dana," meddai Samantha.
"Yn y gorffennol fysa hi ddim wedi mynd at bobl eraill a siarad efo nhw; heddiw mae hi wedi bod yn siarad efo nifer o bobl yma.
"Mi fysa hi fel arfer wedi bod yn sownd i mi, ond mae hi wedi bod yn mynd ar liwt ei hun, mae hi wedi bod efo'r ceffylau.
"Mae ei hyder wedi tyfu cymaint a dw i'n meddwl mai'r gorfod gosod ffiniau a bod yn gadarn efo'r ceffylau sydd wedi ei helpu hi'n fawr."
Ychwanegodd: "Mae hi'n cerdded gyda'i phen yn uwch – mae ei hyder hi wedi gwella'n aruthrol."
