Mae dau ddyn yn yr ysbyty ac un wedi ei arestio ar ôl yr hyn mae’r heddlu yn ei alw’n “aflonyddwch” ym Mhwllheli.

Dywedodd Heddlu Gogledd Cymru bod y digwyddiad yn cynnwys tri dyn, a oedd yn ôl adroddiadau yn rhan o ffrae y tu allan i adeilad preswyl Yr Eifl ar Ffordd Mela.

Cafodd dau ddyn anafiadau yn ystod y digwyddiad hwn ac fe'u cludwyd i'r ysbyty wedi hynny.

Dywedodd yr heddlu nad oedden nhw’n credu bod eu hanafiadau yn peryglu eu bywydau.

Cafodd y dyn arall ei arestio yn y fan a'r lle ar amheuaeth o droseddau yn ymwneud ag anafu.

Dywedodd yr Arolygydd Andrew Davies: “Mae swyddogion yn parhau yn y fan a'r lle wrth i'n hymchwiliad i'r digwyddiad hwn barhau.

“Rydym am sicrhau'r gymuned leol nad oes unrhyw fygythiad parhaus i'r cyhoedd, ac mae'r sawl sydd o dan amheuaeth yn y ddalfa ar hyn o bryd.

“Os wnaethoch chi weld unrhyw beth, neu os oes gennych wybodaeth a allai gynorthwyo ein hymholiadau, cysylltwch â ni drwy ein gwefan neu drwy ffonio 101, gan ddyfynnu cyfeirnod y digwyddiad C123655,” meddai.